അങ്കമാലി; അപകടത്തില്‍പ്പെട്ട ബൈക്ക് തനിയെ 100 മീറ്ററോളം ഓടി റോഡ് മുറിച്ചു കടന്ന് ഒരാളെ ഇടിച്ചുവീഴ്ത്തി. അങ്കമാലി ടെല്‍ക് ജംഗ്ഷനിലാണ് വ്യത്യസ്തമായ അപകടമുണ്ടായത്. ടെല്‍ക് മേല്‍പ്പാലത്തില്‍ അപകടത്തില്‍പ്പെട്ട ബൈക്ക് ഓടിച്ചിരുന്ന ആള്‍ തെറിച്ചു റോഡില്‍ വീഴുകയായിരുന്നു. തുടര്‍ന്നാണ് ബൈക്ക് ആളില്ലാതെ ഓടിവന്ന് റോഡ് മുറിച്ചു കടന്ന് ടെല്‍ക്ക് കമ്പനി ഗേറ്റിനകത്തുനിന്ന സെക്യൂരിറ്റിക്കാരനെ ഇടിച്ചുവീഴ്ത്തിയത്.
സെക്യൂരിറ്റി ഓഫീസിനു മുന്നില്‍ നില്‍ക്കുകയായിരുന്ന സുരേന്ദ്രന്‍ നായര്‍ക്കാണ്(50) പരിക്കേറ്റത്. ബ്രേക്ക് തകരാറായതിനെ തുടര്‍ന്നാണ് ബൈക്കിന്റെ നിയന്ത്രണം വിട്ടത്. ഏറെനേരം കാത്തുനിന്ന് കുറുകെ കടക്കാനാവുന്ന തിരക്കു നിറഞ്ഞ ദേശിയ പാത അനായാസം കടന്നാണ് ബൈക്ക് അപകടമുണ്ടാക്കിയത്. ഭക്ഷണം കഴിക്കാന്‍ പുറത്തിറങ്ങിയ സുരേന്ദ്രനെ പുറകില്‍ നിന്ന് ബൈക്ക് ഇടിക്കുകയും ശരീരത്തിലേക്ക് മറിഞ്ഞുവീഴുകയുമായിരുന്നു.
Read Also : വിദ്യാര്‍ത്ഥികള്‍ സഞ്ചരിച്ച കാര്‍ ബൈക്കിലിടിച്ച് അപകടം : ബൈക്ക് യാത്രക്കാരന്‍ മരിച്ചു
കൊയമ്പത്തൂരില്‍ നിന്ന് എറണാകുളത്തേക്ക് പോയ ഫാര്‍മസ്യൂട്ടിക്കല്‍ കമ്പനി ജീവനക്കാരന്‍ കൊയമ്ബത്തൂര്‍ സ്വദേശി ദിനേഷ് കുമാറിന്റേതായിരുന്നു ബൈക്ക്. ദിനേഷ് മേല്‍പ്പാലത്തിന്റെ കൈവരിയില്‍ തൂങ്ങിക്കിടക്കുകയായിരുന്നു. അപകടത്തില്‍പ്പെട്ട ഇരുവരേയും ആശുപത്രിയില്‍ എത്തിച്ചു. വാരിയെല്ലുകള്‍ക്ക് പൊട്ടലുള്ള ദിനേഷ്‌കുമാറിന് ശസ്ത്രക്രിയ ചെയ്തു. സുരേന്ദ്രനെ പ്രഥമശുശ്രൂഷ നല്‍കി വിട്ടയച്ചു.
Post Your Comments