തൃശ്ശൂരില്‍ കോടതിയ്‌ക്കുള്ളില്‍ വെച്ച്‌ പ്രതി പൊലീസുകാരന്റെ തലയ്ക്കടിച്ച് പരുക്കേല്‍പ്പിച്ചു. ബീഡി വാങ്ങിക്കൊടുക്കാത്തതിന്‍റെ പേരിലാണ് ഇയാൾ എഎസ്‌ഐയുടെ തല വിലങ്ങുകൊണ്ട് അടിച്ചു പൊട്ടിച്ചതെന്നാണ് റിപ്പോർട്ട് . തൃശ്ശൂര്‍ ഒന്നാം ക്ലാസ് അഡീഷണല്‍ സെ‌ഷന്‍സ് കോടതിയിലാണ് സംഭവം. നെടുപുഴ കവര്‍ച്ചാ കേസിലെ വിചാരണയ്‌ക്കായി പ്രതിയെ കോടതിയില്‍ എത്തിച്ചപ്പോഴായിരുന്നു സംഭവം.
പരിക്കേറ്റ എ ആര്‍ ക്യാമ്പ് എഎസ്‌ഐ ജോമി കെ ജോസിനെ ജനറല്‍ ആശുപത്രിയില്‍ പ്രവേശിപ്പിച്ചു. നിരവധി ക്രിമിനല്‍ കേസുകളിലെ പ്രതിയായ എറണാകുളം വടുതല സ്വദേശി ഏണസ്റ്റാണ് പൊലീസുകാരെ ആക്രമിച്ചത്. ഇയാളുടെ ആരോഗ്യനില തൃപ്തികരമാണെന്ന് ഡോക്ടര്‍മാര്‍ അറിയിച്ചു.
മജിസ്ട്രേട്ട് ഭക്ഷണം കഴിക്കാനായി കോടതിയില്‍ നിന്നു പുറത്തേക്കു പോയതിനു പിന്നാലെയാണ് അഭിഭാഷകരുടെയും ജീവനക്കാരുടെയും മുന്നില്‍ ആക്രമണമുണ്ടായത്. ജോമിയുടെ നേതൃത്വത്തിലുള്ള കാവല്‍ സംഘത്തോട് ബീഡി വാങ്ങി നല്‍കണമെന്ന് ഏണസ്റ്റ് പലവട്ടം ആവശ്യപ്പെട്ടു. പറ്റില്ലെന്നു പറഞ്ഞതോടെ ഇയാള്‍ ആക്രമിക്കുകയായിരുന്നു.
Post Your Comments