പെരിന്തല്‍മണ്ണ: മത്സരത്തിനിടെ പ്രശസ്ത ഫുട്ബോള് താരം ധനരാജ് കുഴഞ്ഞ് വീണ് മരിച്ചു. ഞായറാഴ്ച രാത്രി ഒന്‍പതോടെ പെരിന്തല്‍മണ്ണ നെഹ്‌റു സ്റ്റേഡിയത്തിലായിരുന്നു സംഭവം. പാലക്കാട് കൊട്ടേക്കാട് സ്വദേശിയായ ധനരാജ് ഞായറാഴ്ച രാത്രി നടന്ന 48ാമത് ഖാദറലി അഖിലേന്ത്യാ സെവന്‍സ് ഫുട്ബോള് ടൂര്‍ണ്ണമെന്റില്‍ മത്സരത്തിനിടെയാണ് മരണം. ആദ്യപകുതി അവസാനിക്കാന്‍ നിമിഷങ്ങള്‍ ശേഷിക്കെ നെഞ്ചുവേദന അനുഭവപ്പെടുന്നതായി റഫറിയെ അറിയിച്ച ധനരാജ് ഉടന്‍ കുഴഞ്ഞു വീഴുകയുമായിരുന്നു.
സ്റ്റേഡിയത്തിലുണ്ടായിരുന്ന ഡോക്ടറും സംഘവും ഉടന്‍ തൊട്ടടുത്ത മൗലാന ആശുപത്രിയിലെത്തിച്ചു. അര മണിക്കൂറിനകം മരണം സംഭവിച്ചു. മുന്‍ സന്തോഷ് ട്രോഫി താരമായിരുന്നു ധനരാജ്. 2014- ല്‍ മഞ്ചേരിയില്‍നടന്ന ഫെഡറേഷന്‍ കപ്പില്‍ മുഹമ്മദന്‍സിന്റെ ക്യാപ്റ്റന്‍ ആയിരുന്നു. ഇന്ത്യയിലെ പ്രമുഖ ക്ലബ്ബുകളായ മോഹന്‍ബഗാന്‍, ഈസ്റ്റ് ബംഗാള്‍ തുടങ്ങിയവയ്ക്കായും ബൂട്ടണിഞ്ഞിട്ടുണ്ട്. പാലക്കാട് കൊട്ടേക്കാട് തെക്കോണിയില്‍ പരേതരായ രാധാകൃഷ്ണന്‍- മാരി ദമ്പതിമാരുടെ മകനായ ധന്‍രാജ് ഇപ്പോള്‍ പാലക്കാട് മലമ്പുഴ ടാലന്റ് ഫുട്ബോള് അക്കാദമിയിലെ പരിശീലകനാണ്.
Post Your Comments