തീപിടുത്തം തടയാൻ ഈ സുരക്ഷാനിർദ്ദേശങ്ങൾ ഉറപ്പായും പാലിക്കുക

തിരുവനന്തപുരം : കെട്ടിടങ്ങളിൽ തീപിടുത്തമുണ്ടാകുന്നത് വ്യാപകമായ സാഹചര്യത്തിൽ വൈദ്യുത സംവിധാനത്തിന്റെ സുരക്ഷ ഉറപ്പുവരുത്തുന്നതിന് സ്ഥാപന മേധാവികൾ, ഉടമകൾ, പൊതുജനങ്ങൾ എന്നിവർ സുരക്ഷാനിർദ്ദേശങ്ങൾ പാലിക്കണമെന്ന് ഇലക്ട്രിക്കൽ ഇൻസ്‌പെക്ടറേറ്റ് വകുപ്പ് അറിയിച്ചു. കെട്ടിടങ്ങളിൽ എർത്ത് ലീക്കേജ് സർക്യൂട്ട് ബ്രേക്കറിന്റെ പ്രവർത്തനക്ഷമത ഉറപ്പുവരുത്തണം. കേടായവ മാറ്റി സ്ഥാപിക്കണം. എർത്തിംഗ് സംവിധാനത്തിന്റെ കാര്യക്ഷമത ഉറപ്പാക്കാനായി എർത്ത് ഇലക്‌ട്രോഡിന് ചുറ്റും വെള്ളം ഒഴിക്കുക. എർത്ത് കമ്പിയിൽ പൊട്ടലുകളോ ലൂസ് കോണ്ടാക്‌ടോ ഇല്ലെന്ന് ഉറപ്പുവരുത്തണം.
വൈദ്യുത ജോലികൾ സ്വയം ചെയ്യരുത്. താത്കാലിക വയറിംഗ് ഒഴിവാക്കുക. ആവശ്യമുള്ളപക്ഷം പി.വി.സി പൈപ്പിനകത്തു കൂടി മാത്രം ചെയ്യുക. ഇതിനായി
ലൈസൻസുള്ള ഇലക്ട്രിക്കൽ കോൺട്രാക്ടറുടെ സേവനം തേടണം.

നിലവാരം കുറഞ്ഞ അലങ്കാര ദീപങ്ങൾ, എൽ.ഇ.ഡി, സി.എഫ്.എൽ വിളക്കുകൾ ഉപയോഗിക്കരുത്. ഇവ പൊട്ടിത്തെറിക്കാനും വൈദ്യുതാഘാതം, തീപിടുത്തം എന്നിവയ്ക്കും കാരണമാകും. നിലവാരം കുറഞ്ഞ ഉപകരണങ്ങൾ വൈദ്യുത നഷ്ടത്തിനും കാരണമാകും.
വൈദ്യുത ഉപകരണങ്ങൾ അംഗീകൃത സ്ഥാപനങ്ങളിൽ നിന്ന് മാത്രം വാങ്ങുക. ഇവയ്ക്ക് ഐ.എസ്.ഐ മുദ്രണമുണ്ടെന്ന് ഉറപ്പുവരുത്തണം. ഗുണനിലവാരം
കുറഞ്ഞവ പെട്ടെന്ന് കേടാവുകയും ഇവ ഉപേക്ഷിക്കുമ്പോൾ പരിസ്ഥിതി മലിനീകരണമുണ്ടാവുകയും ചെയ്യും.

സ്വിച്ചുബോർഡുകളും പാനലുകളും തുറന്നിടരുത്. അകത്ത് കടക്കുന്ന ഇഴജന്തുക്കളോ മറ്റ് വസ്തുക്കളോ ഷോർട്ട് സർക്യൂട്ടിന് കാരണമാകും. കൂടാതെ സ്വിച്ച് ബോർഡ്,
പാനൽ എന്നിവയ്ക്ക് മുകളിൽ വിളക്ക്, മെഴുകുതിരി, ചന്ദനത്തിരി എന്നിവ കത്തിച്ചുവയ്ക്കരുത്. കട്ടികൂടിയ കമ്പികൾ ഫ്യൂസ് വയറുകളായി
ഉപയോഗിച്ചിട്ടുണ്ടെങ്കിൽ അവ മാറ്റി ആവശ്യമായ അളവിലുള്ള ഫ്യൂസുകൾ മാത്രം ഉപയോഗിക്കുക. തീപിടുത്തമുണ്ടായാൽ ആദ്യം തന്നെ കെട്ടിടത്തിലേക്കുള്ള
വൈദ്യുതബന്ധം വിച്ഛേദിക്കണം. ഇതിനായി കെട്ടിടത്തിലെ പ്രധാന സ്വിച്ച് എവിടെയാണെന്നും അത് എങ്ങനെയാണ് പ്രവർത്തിപ്പിക്കേണ്ടതെന്നും ബന്ധപ്പെട്ടവരെ
പരിശീലിപ്പിച്ചിരിക്കണം. സോളാർ പ്ലാന്റ് സ്ഥാപിച്ചിട്ടുണ്ടെങ്കിൽ ഇതിൽ നിന്നുള്ള വൈദ്യുതബന്ധം വിച്ഛേദിക്കാൻ മറക്കരുത്.  അടിയന്തര അവസരങ്ങളിൽ പുറത്തേക്ക് പോകേണ്ട വഴി അടയാളപ്പെടുത്തിവയ്ക്കുന്നതോടൊപ്പം ഇത് സുഗമമായി പരിരക്ഷിക്കുകയും ചെയ്യണം.

വൈദ്യുത സ്വിച്ച്  ബോർഡുകൾക്ക് മുന്നിൽ സാധനസാമഗ്രികൾ കൂട്ടിയിട്ട് വഴി തടസ്സപ്പെടുത്തരുത്. ഒരു പ്ലഗ് സോക്കറ്റിൽ നിന്ന് ഒന്നിൽ കൂടുതൽ വൈദ്യുതോപകരണങ്ങൾ  പ്രവർത്തിപ്പിക്കരുത്. ഓരോ ദിവസവും സ്ഥാപനം അടയ്ക്കുമ്പോൾ മെയിൻ സ്വിച്ച് ഓഫ് ചെയ്യുക. അല്ലെങ്കിൽ അത്യാവശ്യമല്ലാത്ത എല്ലാ വൈദ്യുതോപകരണങ്ങളും ഓഫ് ചെയ്തിട്ടുണ്ടെന്ന് ഉറപ്പുവരുത്തുക. ഇൻവെർട്ടർ/ യു.പി.എസ്/ സോളാർ എന്നിവയുടെ ബാറ്ററികളിൽ ആവശ്യമായ വെള്ളം നിറയ്ക്കുകയും വൃത്തിയായി സൂക്ഷിക്കുകയും ബാറ്ററിക്ക് ചുറ്റും ആവശ്യമായ വായു സഞ്ചാരം ഉറപ്പുവരുത്തുകയും ചെയ്യുക. ഇവയ്ക്ക് സമീപം തീപിടിക്കാൻ സാധ്യതയുള്ള വസ്തുക്കളില്ലെന്ന് ഉറപ്പുവരുത്തുക.

ഫയർ പമ്പുകൾ, അവയുടെ സ്വിച്ചുകൾ, ഫയർ അലാറം എന്നിവ പ്രവർത്തനസജ്ജമാണെന്ന് ഉറപ്പുവരുത്തുക. ബന്ധപ്പെട്ടവർക്ക് ഇവ പ്രവർത്തിപ്പിക്കാൻ പരിശീലനം നൽകണം. ആവശ്യമായ അഗ്നിശമനകങ്ങളുണ്ടെന്ന് ഉറപ്പുവരുത്തണം. ബന്ധപ്പെട്ടവർക്ക് ഇവ പ്രവർത്തിപ്പിക്കാൻ പരിശീലനം നൽകണം. ഗ്യാസ് സിലിണ്ടറുകൾ, ഡീസൽ എന്നിവ സ്വിച്ച് ബോർഡ്, പാനൽ എന്നിവയ്ക്കരികിൽ സൂക്ഷിക്കരുത്. വ്യാവസായിക സ്ഥാപനങ്ങളിലെ ബോയിലറിനടുത്ത് തീപിടിക്കുന്ന വസ്തുക്കൾ കൂട്ടിയിടരുത്. വൈദ്യുത പാനലുകൾ, കേബിളുകൾ, സ്വിച്ചുകൾ മുതലായവയ്ക്ക് സാധാരണയിൽ കവിഞ്ഞ ചൂടുണ്ടായാൽ ഇവ ശരിയാക്കാനുള്ള നടപടി സ്വീകരിക്കണം.