കോഴിക്കോട്: കോഴിക്കോട് കിനാലൂരില്‍ വീടിന് നേരെ വെടിവയ്പ്പ്. കിനാലൂര്‍ പാറത്തലക്കല്‍ ബാബുരാജിന്റെ വീടിന് നേരെയാണ് വെടിവപ്പുണ്ടായത്. സംഭവത്തെ തുടര്‍ന്ന് പോലീസ് അന്വേഷണം ആരംഭിച്ചു.
വീടിന്റെ കിടപ്പു മുറിയുടെ ജനല്‍ച്ചില്ല് തകര്‍ത്ത വെടിയുണ്ട ചുമരില്‍ തറച്ചു. സംഭവത്തില്‍ ആര്‍ക്കും പരിക്കില്ല. ആരാണ് വെടിവെച്ചതെന്ന് കണ്ടെത്താനായിട്ടില്ല. ആരുമായും പ്രശ്‌നങ്ങള്‍ ഇല്ലെന്നും വെടിവെപ്പിനുള്ള കാരണം അറിയില്ലെന്നും ബാബുരാജ് പറഞ്ഞു. വീടിനുള്ളില്‍ നിന്നും വെടിയുണ്ടയുടെ അവശിഷ്ടങ്ങള്‍ പോലീസ് ശേഖരിച്ചിട്ടുണ്ട്.
സംഭവത്തില്‍ ദുരൂഹതയില്ലെന്നാണ് പോലീസിന്റെ പ്രാഥമിക നിഗമനം. സമീപത്തെ വനത്തില്‍ പന്നിയെ വേട്ടയാടാന്‍ എത്തിയവര്‍ അബദ്ധത്തില്‍ വെടിവച്ചതാണെന്നാണ് നിഗനമം. ഈ പ്രദേശത്ത് പന്നിയെ വേട്ടയാടാന്‍ ആളുകള്‍ എത്താറുണ്ടെന്ന് നാട്ടുകാരും സാക്ഷ്യപ്പെടുത്തുന്നു.
Post Your Comments