ഭാര്യക്ക് തടികൂടിയെന്നാരോപിച്ച് മുത്തലാഖ് ചൊല്ലിയ ഭർത്താവ് അറസ്റ്റില്‍

ഭോപ്പാൽ: മധ്യപ്ര​ദേശിൽ ഭാര്യയെ മുത്തലാഖ് ചൊല്ലിയ ഭർത്താവിനെ പോലീസ് അറസ്റ്റ് ചെയ്തു. ജബുവ സ്വദേശി ആരിഫ് ഹുസൈനാണ് അറസ്റ്റിലായത്. ഇയാളുടെ ഭാര്യ മേഘ്നഗറിലെ ഷെരാണി മുല്ല സ്വദേശിയായ സൽമ ഭാനു നൽകിയ പരാതിയിലാണ് അറസ്റ്റ്.

പൊണ്ണത്തടി കാരണമാണ് ഭർത്താവ് മൊഴി ചൊല്ലിയതെന്ന് ഭാര്യ സൽമ ഭാനു പരാതിയിൽ ആ​രോപിച്ചു. പൊണ്ണത്തടിയാണെന്ന് പറഞ്ഞ് ആരിഫ് വളരെ മോശമായി പെരുമാറുകയും ദേഹോപദ്രവം ഏല്‍പിക്കുകയും ചെയ്യാറുണ്ട്. മേഘ്നഗറിലെ വീട്ടിലെത്തിയാലും ക്രൂ​രമായ മർദ്ദനത്തിന് ഇരയാക്കും. ഇതിനിടയിൽ ആരിഫ് തന്നെ മൊഴി ചൊല്ലുകയും ചെയ്തപ്പോഴാണ് പോലീസിൽ പരാതി നൽകാൻ തീരുമാനിച്ചതെന്നും ഭാനു കൂട്ടിച്ചേർത്തു.

ഇയാൾക്കെതിരെ 2018 പുതിയ മുസ്ലീം വനിതാ (വിവാഹ സംരക്ഷണ അവകാശം) നിയമപ്രകാരം കേസെടുത്തതായി മേഘ്നഗർ എസ്എച്ച്ഒ കുശാൽ സിങ്ങ് റാവത്ത് പറഞ്ഞു. 10 വർഷം മുമ്പാണ് സൽമ ഭാനുവും ആരിഫും വിവാഹിതരായത്. ഇവർക്ക് രണ്ട് കുട്ടികളുണ്ട്