കല്‍പ്പറ്റയില്‍ മദ്യം കഴിച്ച മൂന്ന് പേര്‍ മരിച്ചു; സംഭവത്തില്‍ ദുരൂഹത ആരോപിച്ച് ബന്ധുക്കള്‍

വയനാട്: കല്‍പ്പറ്റയില്‍ മദ്യം കഴിച്ച മൂന്ന് പേര്‍ മരിച്ചു. ഇന്നലെയാണ് കല്‍പ്പറ്റയ്ക്കടുത്തുള്ള വെള്ളമുണ്ടയില്‍ മൂന്ന് പേര്‍ മദ്യം കഴിച്ചതിനെ തുടര്‍ന്ന് മരണപ്പെട്ടത്. വാരാമ്പറ്റ കൊച്ചാറ കോളനിയിലെ പിഗിനായി (65), മകന്‍ പ്രമോദ് (36), ഇവരുടെ ബന്ധുവും അതേ കോളനിയിലെ താമസക്കാരനുമായ മാധവന്റെ മകന്‍ പ്രസാദ് (38) എന്നിവരാണ് മരിച്ചത്.

പിഗിനായിക്ക് വീടുകളില്‍ പൂജകള്‍ ചെയ്യുന്ന പതിവുണ്ടായിരുന്നു. പൂജയ്ക്കായി കൊണ്ടുവന്ന വിദേശമദ്യമാണ് ഇവര്‍ കഴിച്ചിരുന്നത്. മദ്യത്തില്‍ വിഷം കലര്‍ന്നിരുന്നതായി സംശയിക്കുന്നെന്ന് വെള്ളമുണ്ട പോലീസ് പറഞ്ഞു. ഇന്നലെ കോളനിയില്‍ വച്ചുണ്ടായ പൂജയ്ക്ക് ശേഷം മദ്യപിച്ചിരുന്ന പിഗിനായി ഇന്നലെ വൈകീട്ടോടെ കുഴഞ്ഞ് വീണ് മരിക്കുകയായിരുന്നു.

പിഗിനായുടെ മരണത്തിന് പിന്നാലെ ഇന്നലെ രാത്രി 10 മണിയോടെ പ്രമോദും പ്രസാദും കുഴഞ്ഞു വീഴുകയായിരുന്നു. ഇരുവരെയും മാനന്തവാടി ജില്ലാശുപത്രിയിലെത്തിച്ചെങ്കിലും പ്രമോദ് യാത്രാമധ്യേയും പ്രസാദ് ആശുപത്രിയില്‍ വെച്ചും മരിക്കുകയായിരുന്നു. പോസ്റ്റ്‌മോര്‍ട്ടം നടത്തിയിട്ടില്ലെന്നും ഇത് കഴിഞ്ഞാലേ എന്തെങ്കിലും വ്യക്തമാകൂനെന്നും പോലീസ് പറഞ്ഞു. സംഭവത്തില്‍ പോലീസ് അന്വേഷണം ആരംഭിച്ചു.