ക്ഷേത്ര ദര്‍ശനം കഴിഞ്ഞ് മടങ്ങവേ പ്രതിശ്രുത വധുവിന് ദാരുണാന്ത്യം

തിരുവനന്തപുരം: ക്ഷത്രദര്‍ശനം കഴിഞ്ഞ് മടങ്ങവേ പ്രതിശ്രുത വധുവിന് അപകടത്തില്‍ ദാരുണാന്ത്യം. നേമം ശാന്തിവിള ആശുപത്രിക്ക് സമീപം, ടിസി 53-1893 കൃഷ്ണകൃപയില്‍ രാഖി എസ്.കൃഷ്ണ (29)യാണ് മരിച്ചത്. കിള്ളിപ്പാലത്തിന് സമീപത്തെ റോഡിലായിരുന്നു അപകടം. കഴിഞ്ഞ ദിവസം രാവിലെ 10.30ന് ക്ഷേത്രദര്‍ശനം കഴിഞ്ഞു സ്‌കൂട്ടറില്‍ മടങ്ങവെ നിര്‍ത്തിയിട്ടിരുന്ന കാറിലിടിച്ച് റോഡിലേക്കു തെറിച്ച് വീണ രാഖിയുടെ ശരീരത്തിലൂടെ പിന്നാലെ വന്ന ലോറിയുടെ പിന്‍ചക്രം കയറിയിറങ്ങി തല്‍ക്ഷണം മരിക്കുകയായിരുന്നു. വലിയശാല ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സ് ആന്‍ഡ് ടെക്‌നോളജിയിലെ താല്‍ക്കാലിക ഓഫിസ് അസിസ്റ്റന്റാണ് രാഖി. മൃതദേഹം പോസ്റ്റ് മോര്‍ട്ടത്തിന് ശേഷം ബന്ധുക്കള്‍ക്ക് വിട്ടുനല്‍കി. കരമന പൊലീസ് കേസെടുത്തു.