ബിഗ് ബോസ് ആരംഭിച്ച്‌ മൂന്ന് മാസം പിന്നിട്ട് യാത്ര അവസാന ഘട്ടത്തിലേക്ക് എത്തി കൊണ്ടിരിക്കുകയാണ്. മത്സരത്തില്‍ ആര് ജയിക്കും എന്നറിയാനുള്ള ആകാംഷയിലാണ് പ്രേക്ഷകര്‍. അതിനിടെ സോഷ്യല്‍ മീഡിയയില്‍ ബിഗ് ബോസിനെതിരെ വ്യാപകമായ പ്രതിഷേധം ഉയര്‍ന്ന് കൊണ്ടിരിക്കുകയാണ്. ശക്തരായ മത്സരാര്‍ത്ഥികളെ പുറത്താക്കുന്നു എന്നതാണ് ചിലര്‍ ചൂണ്ടി കാണിക്കുന്നത്. നന്നായി ഗെയിം കളിക്കുന്ന പലരെയും ഫാൻസ്‌ വോട്ടിങ്ങിന്റെ അടിസ്ഥാനത്തിൽ നേരത്തെ പുറത്താക്കിയിരുന്നു.
എന്നാൽ ഇന്നലത്തെ നോമിനേഷൻ തീർത്തും അനീതിയാണെന്നാണ് ബിഗ് ബോസിന്റെ ആരാധകർ ചൂണ്ടിക്കാണിക്കുന്നത്. മറ്റുള്ള അംഗങ്ങൾ തങ്ങൾക്ക് എതിരാളികൾ ആകുന്നവരെ നോമിനേറ്റ് ചെയ്തപ്പോൾ മടിയന്മാരായ ചിലർ ഇതിലൂടെ രക്ഷപെടുകയായിരുന്നു എന്നാണു പ്രധാന പരാതി. ബിഗ് ബോസിലെ ആദ്യ മത്സരാര്‍ത്ഥിയായി പരിചയപ്പെടുത്തിയത് ശ്വേത മേനോനെയായിരുന്നു. നടി, അവതാരക, മോഡല്‍ എന്നിങ്ങനെ കരിയറില്‍ സുവര്‍ണ നേട്ടങ്ങള്‍ കൊയ്ത ശ്വേത ബിഗ് ബോസിലെ ശക്തരായ മത്സരാര്‍ത്ഥികളില്‍ ഒരാളായിരുന്നു.
വീട്ടിലെ എല്ലാ കാര്യങ്ങളിലും ഇടപ്പെട്ടിരുന്ന ശ്വേത ബിഗ് ബോസ് വിജയി ആവാന്‍ സാധ്യതയുള്ളവരുടെ പട്ടികയിലുണ്ടായിരുന്നു. എന്നാല്‍ രഞ്ജിനി ഹരിദാസിനൊപ്പം നോമിനേഷനില്‍ വന്ന ശ്വേത പുറത്ത് പോവുകയായിരുന്നു. വൈല്‍ഡ് കാര്‍ഡ് എന്‍ട്രിയിലൂടെ ശ്വേത തിരിച്ച്‌ വരുമെന്ന് മത്സരാര്‍ത്ഥികളും പ്രേക്ഷകരും കരുതിയിരുന്നെങ്കിലും അങ്ങനെ ഒന്ന് ഉണ്ടായില്ലായിരുന്നു. നല്ല ഗെയിം കളിച്ചിരുന്ന രഞ്ജിനി ബിഗ് ബോസിലെ ശക്തരായ മത്സരാര്‍ത്ഥികളില്‍ ഒരാളായിരുന്നു.
60 ദിവസം ബിഗ് ബോസില്‍ കഴിഞ്ഞതിന് ശേഷമായിരുന്നു രഞ്ജിനി പുറത്തേക്ക് പോയത്. പേളി, അര്‍ച്ചന, ശ്രീനിഷ്, സുരേഷ് എന്നിവരായിരുന്നു രഞ്ജിനിക്കൊപ്പം നോമിനേഷനിലുണ്ടായിരുന്നത്. ശേഷം ആ ആഴ്ചയിലെ എലിമിനേഷനില്‍ രഞ്ജിനി പുറത്ത് പോവുകയായിരുന്നു. ഇതും ആരാധകർക്ക് ശക്തമായ പ്രതിഷേധത്തിന് ഇടയാക്കി. രഞ്ജിനിയെ തിരിച്ചു കൊണ്ടുവരണമെന്ന ആവശ്യം പ്രേക്ഷകർക്കിടയിൽ ശക്തമായിരുന്നു. പ്രളയ സമയത്താണ് രഞ്ജിനി ഔട്ട് ആയത്. ഇതാണ് ഇതിനായി ആരാധകർ പറയുന്ന ന്യായം.
ഈ കഴിഞ്ഞ ദിവസം ബിഗ് ബോസില്‍ നിന്നും എലിമിനേറ്റായ മത്സരാര്‍ത്ഥിയായിരുന്നു ബഷീര്‍. ഹൗസിലെ ജോലികള്‍ നന്നായി ചെയ്യുകയും ഗെയിമുകള്‍ മനോഹരമായി ചെയ്യുകയും ചെയ്തിരുന്ന ബഷീര്‍ നല്ലൊരു ഗെയിമായിരുന്നു കളിച്ചിരുന്നത്. ബിഗ് ബോസിലെ വിജയി ആവാന്‍ യോഗ്യത ബഷീറിനുണ്ടെന്ന് പല സമയത്തും പ്രേക്ഷകര്‍ പറഞ്ഞിരുന്നു. എന്നാല്‍ ഇത്തവണത്തെ എലിമിനേഷനില്‍ ശ്രീനിഷും ബഷീറുമായിരുന്നു അവസാനമുണ്ടായിരുന്നത്. അതില്‍ ബഷീറിനെ പുറത്താക്കുകയായിരുന്നു. തുടര്‍ച്ചയായി എലിമിനേഷനിലെത്തുന്ന മത്സരാര്‍ത്ഥിയാണ് ശ്രീനിഷ്.
പേളിയുമായി പ്രണയത്തിലായതിന് ശേഷം ശ്രീനിഷ് എലിമിനേഷനുകളില്‍ നിന്നും നിരന്തരം രക്ഷപ്പെടുന്നുണ്ടായിരുന്നു. ഇത്തവണ പുറത്ത് പോവുന്നതില്‍ ബഷീറിനെക്കാള്‍ യോഗ്യന്‍ ശ്രീനിഷാണെന്നാണ് സോഷ്യല്‍ മീഡിയ പറയുന്നത്. ശ്രീനിഷ്-പേളി പ്രണയം കാണാന്‍ ആളുള്ളതിനാല്‍ ശ്രീനി പുറത്തായാല്‍ ബിഗ് ബോസിന് നഷ്ടമാണെന്നും അതിനാല്‍ ശ്രീനിയെ വെറുതെ സംരക്ഷിക്കുകയാണെന്നുമാണ് ചിലരുടെ കണ്ടെത്തൽ.
ഏറ്റവുമൊടുവിൽ നോമിനേഷനിൽ വന്നിരിക്കുന്നവർ ഫൈനലിൽ എത്താൻ യോഗ്യതയുള്ള ബെസ്റ്റ് പ്ലെയേഴ്‌സ് ആണെന്നതാണ് രസകരം. ഫൈനലിൽ എത്തിയവർ ആകട്ടെ യാതൊരു യോഗ്യതയുമില്ലാത്തവരും. ശ്രീനിഷ്, അദിതി , അരിസ്റ്റോ സുരേഷ് തുടങ്ങിയവർ ഫൈനലിൽ എതിരില്ലാതെ എത്തിയപ്പോൾ സാബു, അർച്ചന, പേളി ഷിയാസ് തുടങ്ങിയവർ നോമിനേഷനിൽ എത്തി. ഇതിൽ ആര് പോയാലും ബിഗ് ബോസിന് നഷ്ടമാണെന്നാണ് പ്രേക്ഷകർ പറയുന്നത്.
Post Your Comments