അമ്പലത്തറ: സ്‌കൂള്‍ വിട്ട് മടങ്ങുകയായിരുന്ന വിദ്യാര്‍ത്ഥിനിയെ ഓട്ടോറിക്ഷയില്‍ തട്ടിക്കൊണ്ടുപോയി പീഡിപ്പിക്കാന്‍ ശ്രമിച്ച മത്സ്യവില്‍പ്പനക്കാരനായ മധ്യവയസ്കനെ പോലീസ് അറസ്റ്റ് ചെയ്തു. അമ്പലത്തറ കീച്ചേരിയിലെ സിബി(44)യെയാണ് ചെറുപുഴ എസ്‌ഐ എം ബിജോയിയും സംഘവും അറസ്റ്റ് ചെയ്തത്. രണ്ടു ദിവസം മുൻപ് സ്‌കൂള്‍ വിട്ട് റോഡരികിലൂടെ വീട്ടിലേക്ക് നടന്നുപോവുകയായിരുന്ന പെണ്‍കുട്ടിയെ സ്വകാര്യ ഓട്ടോറിക്ഷയില്‍ വന്ന സിബി ഓട്ടോറിക്ഷയില്‍ വലിച്ചുകയറ്റാന്‍ ശ്രമിക്കുകയായിരുന്നു.
പെൺകുട്ടി നിലവിളിച്ചു കുതറി ഓടി വീട്ടിലെത്തി രക്ഷിതാക്കളോട് വിവരം കരഞ്ഞു കൊണ്ട് പറഞ്ഞു. തുടർന്ന് രക്ഷിതാക്കൾക്കൊപ്പം പെൺകുട്ടിയും സ്റ്റേഷനിലെത്തി പരാതി നൽകി. പെൺകുട്ടി പറഞ്ഞ അടയാളങ്ങളും സി സി ടി വി ദൃശ്യങ്ങളും വെച്ച് ഓട്ടോയുടെ നമ്പർ കണ്ടെത്തുകയും ആർ ടി ഓ അധികൃതരുമായി ബന്ധപ്പെട്ട് പ്രതിയെ പിടികൂടുകയുമായിരുന്നു.
ചെറുപുഴ, കാക്കടവ് ഭാഗങ്ങളില്‍ ഓട്ടോറിക്ഷയില്‍ മത്സ്യവില്‍പ്പന നടത്തുന്ന സിബി ഇതിനു മുമ്പും ഇതേ രീതിയില്‍ സ്ത്രീകള്‍ക്ക് നേരെ അതിക്രമം നടത്തിയിരുന്നുവെങ്കിലും മാനക്കേട് ഓര്‍ത്ത് ആരും പരാതി നല്‍കാന്‍ തയ്യാറായില്ലെന്നു പോലീസ് പറഞ്ഞു.
Post Your Comments