ബ്രേക്ക്ഫാസ്റ്റിനുണ്ടാക്കാം സ്‌പെഷ്യല്‍ ബീഫ് ചമ്മന്തി

ദൂരെ സ്ഥലങ്ങളിലേക്ക് കൊണ്ടുപോകാനും കുറച്ച് ദിവസം കേടുകൂടാതെ ഉപയോഗിക്കാനും സാധിക്കുന്ന ഒന്നാണ് ബീഫ് ചമ്മന്തി. തേങ്ങ ചേര്‍ത്ത് പലതരത്തിലുള്ള ചമ്മന്തികള്‍ നിങ്ങള്‍ കഴിച്ചിട്ടുണ്ടെങ്കിലും ആരും ബീഫ് ചമ്മന്തി ട്രൈ ചെയ്തിട്ടുണ്ടാകില്ല.ചമ്മന്തിപ്പൊടി പോലെ ഉപയോഗിക്കാവുന്ന ഒന്നാണ് ബീഫ് ചമ്മന്തി. ബീഫ് ചമ്മന്തി എങ്ങനെ തയ്യാറാക്കുന്നതെന്ന് നോക്കാം.

ചേരുവകള്‍

1.ബീഫ്- 500 ഗ്രാം
2.മഞ്ഞള്‍പ്പൊടി- 1 /2 സ്പൂണ്‍
3.മല്ലിപ്പൊടി- 1 സ്പൂണ്‍
4.മുളക് പൊടി- 1 സ്പൂണ്‍
5.ഗരം മസാല- 1 സ്പൂണ്‍
6.വെളുത്തുള്ളി- 8 എണ്ണം
7.ഇഞ്ചി- ഒരു കഷ്ണം
8.കറിവേപ്പില- 2 തണ്ട്
9.ഉണക്കമുളക്-10 എണ്ണം
10.വെളിച്ചെണ്ണ- 5 ടേബിള്‍ സ്പൂണ്‍
11.ഉപ്പ് – ആവശ്യത്തിന്

തയ്യാറാക്കേണ്ട വിധം

ബീഫ് നന്നായി കഴുകി അതിലേക്ക് മഞ്ഞള്‍പ്പൊടി, മുളക് പൊടി, മല്ലിപ്പൊടി, ഗരം മസാല, കുറച്ചു ഇഞ്ചി നുറുക്കിയത്, ഉപ്പ് എന്നിവ ചേര്‍ത്ത് തിരുമ്മി അല്‍പം വെള്ളവും ചേര്‍ത്ത് കുക്കറില്‍ പകുതി വേവിക്കുക. അതിനു ശേഷം ബീഫ് കട്ടിയുള്ള ഒരു പാനില്‍ ഇട്ട് നന്നായി ഡ്രൈ റോസ്റ്റ് ചെയ്യുക. ജലാംശം എല്ലാം നീങ്ങി നല്ല വരണ്ട ബീഫ് ആണ് വേണ്ടത്.

ഉണക്കമുളക് എരിവിന് അനുസരിച്ചു വേണ്ടത് തീയില്‍ ചുട്ടെടുക്കുക. ഉണക്കമുളകും ഡ്രൈ റോസ്റ്റ് ചെയ്ത ബീഫുമായി മിക്സിയില്‍ പൊടിച്ചെടുക്കുക. അതിനു ശേഷം ഒരു കട്ടിയുള്ള പാന്‍ അടുപ്പത്തു വച്ച് വെളിച്ചെണ്ണ ഒഴിക്കുക.ചൂടായ വെളിച്ചെണ്ണയിലേക്ക് ഇഞ്ചി, വെളുത്തുള്ളി ചതച്ചത് അല്ലെങ്കില്‍ ചെറുതായി നുറുക്കിയതും കറിവേപ്പിലയും ഇടുക. അതിനുശേഷം അരച്ച് വച്ച ബീഫ് മീഡിയം തീയില്‍ വച്ച് നന്നായി മൊരിച്ചെടുക്കുക. ആവശ്യത്തിന് ഉപ്പും ചേര്‍ത്തുകൊടുക്കുക.