കെട്ടിടം തകര്‍ന്ന് വീണ് പത്ത്‌ പേര്‍ക്ക് ദാരുണാന്ത്യം

കെട്ടിടം തകര്‍ന്ന് വീണ് പത്ത്‌ പേര്‍ക്ക് ദാരുണാന്ത്യം. ശനിയാഴ്ച രാത്രി 9.17നാണ് ദുരന്തമുണ്ടായത്.

ഇന്‍ഡോര്‍:  മധ്യപ്രദേശിലെ ഇന്‍ഡോറില്‍ സര്‍വാത ബസ് സ്റ്റാന്‍ഡിന് സമീപമുള്ള കെട്ടിടം തകര്‍ന്ന് വീണാണ് പത്ത്‌ പേര്‍ മരിച്ചത്. അഞ്ച് പേര്‍ ഇപ്പോഴും കെട്ടിടാവശിഷ്ടങ്ങള്‍ക്കിടയില്‍ കുടുങ്ങി കിടക്കുന്നതായാണ് റിപ്പോര്‍ട്ട്. ഇതുവരെ ഒമ്പത് പേരെ രക്ഷിച്ചു. ഏഴ് പേര്‍ക്ക് പരിക്കേറ്റതായും റിപ്പോര്‍ട്ടുണ്ട്. അതേസമയം മരണ സംഖ്യ ഇനിയും ഉയരാനാണ് സാധ്യതയെന്ന് അധികൃതര്‍ അറിയിച്ചു.

Also Read : പത്ത് നിമിഷം കൊണ്ട് 15 നില കെട്ടിടം തകര്‍ത്ത് തരിപ്പണമാക്കി ( വീഡിയോ)

കെട്ടിടത്തിലേക്ക് കാര്‍ വന്നിടിച്ചതാണ് അപകടകാരണമെന്നാണ് പ്രാഥമിക നിഗമനം. പഴക്കമേറിയ കെട്ടിടത്തില്‍ ഹോട്ടലുകളും ലോഡ്ജുകളുമാണ് പ്രവര്‍ത്തിച്ചിരുന്നത്. അപകടസമയത്ത് 20 പേര്‍ കെട്ടിടത്തിലുണ്ടായിരുന്നതായി ദൃക്‌സാക്ഷികള്‍ പറഞ്ഞു. എന്നാല്‍ ഇക്കാര്യത്തിന് ഔദ്യോഗിക സ്ഥിരീകരണമില്ല.

അപകടം നടന്ന വിവരം മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന്‍ സ്ഥിരീകരിച്ചു. സംഭവത്തെ തുടര്‍ന്ന് വന്‍ ജനക്കൂട്ടം തടിച്ച് കൂടിയത് രക്ഷാപ്രവര്‍ത്തനം ദുഷ്‌കരമാക്കി. തുടര്‍ന്ന് പൊലീസെത്തി ജനങ്ങളെ നിയന്ത്രിച്ച ശേഷമാണ് രക്ഷാപ്രവര്‍ത്തനം ഫലപ്രദമായി നടത്താനായത്.