കൊച്ചി: ഐഎസ്എല്‍ നാലാം സീസണില്‍ ജയം സ്വന്തമാക്കിയ കേരളാ ബ്ലാസ്റ്റേഴ്‌സ് പോയിന്റ് പട്ടികയില്‍ അഞ്ചാംസ്ഥാനത്തേക്ക് ഉയര്‍ന്നിരിക്കുകയാണ്. പരിശീലകനും പ്രധാന താരങ്ങളും മാറി മറിഞ്ഞ സീസണില്‍ പോയിന്റ് പട്ടികയിലെ അവസാന സ്ഥാനക്കാരില്‍ നിന്നാണ് ബ്ലാസ്റ്റേഴ്‌സ് മുന്‍ നിരയിലേക്ക് ഉയര്‍ന്നത്.
ഇന്നലെ നടന്ന മത്സരത്തില്‍ ഡല്‍ഹി ഡൈനാമോസിനെ ഒന്നിനെതിരെ രണ്ടു ഗോളുകള്‍ക്ക് വീഴ്ത്തിയാണ് കേരളം കിരീട സ്വപ്‌നങ്ങള്‍ സജീവമാക്കിയത്. ഇന്നലെ തന്നെയായിരുന്നു സീസണില്‍ കേരളത്തിന്റെ ടോപ്പ് സ്‌കോറര്‍മാരില്‍ ഒരാളായ സിഫ്‌നിയോസിസ് കൂടുമാറി എഫ്.സി ഗോവയ്‌ക്കൊപ്പം ചേര്‍ന്നതും.
എന്നാല്‍ പുറത്തുപോയ താരങ്ങള്‍ക്കുപകരം ബ്ലാസ്റ്റേഴ്‌സ് മാനേജ്‌മെന്റ് അവതരിപ്പിക്കാന്‍ പോകുന്നത് ആരാധകരുടെ പ്രതീക്ഷകള്‍ വാനോളം ഉയര്‍ത്തുന്ന താരങ്ങളെയാണ്. കഴിഞ്ഞ ദിവസം രണ്ട് സൂപ്പര്‍ താരങ്ങളാണ് കൊച്ചിയിലെത്തി ബ്ലാസ്‌റ്റേഴ്‌സിന്റെ മത്സരം വീക്ഷിച്ചിരിക്കുന്നത്. മുന്‍ ബ്ലാസ്റ്റേഴ്‌സ് താരം പുള്‍ഗയും ബ്രസീലിയന്‍ ഫോര്‍വേഡ് നില്‍മാറുമാണ് കൊച്ചിയിലെ മഞ്ഞക്കടലിനൊപ്പം ചേരാനെത്തിയിരിക്കുന്നത്.
ഡല്‍ഹിയെ പരാജയപ്പെടുത്തിയ ആത്മവിശ്വാസത്തിലുള്ള ബ്ലാസ്റ്റേഴ്‌സ് ക്യാമ്പിലേക്ക് ഇരുതാരങ്ങളും കൂടി എത്തിയാല്‍ ഏത് കൊമ്പന്മാരെയും അട്ടിമറിക്കാന്‍ കേരളപ്പടയ്ക്ക് കഴിയുമെന്ന പ്രതീക്ഷയിലാണ് ആരാധകര്‍.
Post Your Comments