കാഠ്മണ്ഡു: വിമാനം തകര്‍ന്ന് വീണു. അപകടത്തില്‍ 16 പേര്‍ക്ക് പരിക്കേറ്റു. വടക്ക് പടിഞ്ഞാറന്‍ നേപ്പാളിലെ ഹാംല ജില്ലയിലാണ് സംഭവം നടന്നത്. അപകടത്തില്‍ പരിക്കേറ്റവരില്‍ 13 പേര്‍ പോലീസുകാരാണ്. ഇവര്‍ തിരഞ്ഞെടുപ്പ് ഡ്യൂട്ടിക്കായി എത്തിയവരാണ്. ചൊവ്വാഴ്ച്ച രാവിലെ ഒമ്പതിനാണ് അപകടം നടന്നത്. സിമിക്കോട് എയര്‍പോര്‍ട്ടിലാണ് വിമാനം തകര്‍ന്നു വീണത്. അപകടത്തില്‍ പൈലറ്റ് ബസന്ത ലാമായ്ക്ക് സാരമായി പരിക്കേറ്റു.
വിമാനം സൂര്‍ഖേത്തിലേക്ക് പോകാനായി പറക്കാന്‍ ശ്രമിക്കുന്ന വേളയിലാണ് അപകടം നടന്നത്. അപകട കാരണം വിമാനത്തിന്റെ ടയര്‍ പൊട്ടിത്തെറിച്ചതാണെന്നു പോലീസ് മേധാവി എഐജി റാണ ബഹദൂര്‍ ചന്ദ് അറിയിച്ചു.
9N-ABM വിമാനമാണ് അപകടത്തില്‍പ്പെട്ടത്. ഈ വിമാനം റണ്‍വേയില്‍ നിന്ന് പറത്താന്‍ തുടങ്ങിയപ്പോഴാണ് അപകടം ഉണ്ടായത്. സംഭവത്തില്‍ ആളപായമൊന്നുമില്ലെന്നു അധികൃതര്‍ വ്യക്തമാക്കി.
Post Your Comments