ന്യൂഡല്‍ഹി: അത്ര പ്രശസ്ത നടിയായിരുന്നില്ലെങ്കിലും ലീന മരിയ പോളിന്റെ കൈവശം ഉണ്ടായിരുന്നത് കോടികളായിരുന്നു. ഐഎഎസ് ഉദ്യോഗസ്ഥ ചമഞ്ഞ് ബാങ്കില്‍ നിന്നും തട്ടിയത് 19 കോടി; വ്യാജ ഇന്‍ഷുറന്‍സില്‍ ചേര്‍ത്ത് പാവപ്പെട്ടവരില്‍ നിന്നും കോടികള്‍ പോക്കറ്റിലാക്കി. ഇപ്പോള്‍ ലീന മരിയ പോളിന്റെ ജീവിത പങ്കാളിയുടെ ആഡംബരക്കാറുകള്‍ കണ്ട് ഞെട്ടിയിരിക്കുകയാണ് ആദായനികുതി വകുപ്പ്.
എഐഡിഎംകെ പാര്‍ട്ടി ശശികല പക്ഷത്തിന് രണ്ടില ചിഹ്നം ലഭിക്കാന്‍ തിരഞ്ഞെടുപ്പ് കമ്മീഷന് കൈക്കൂലി നല്‍കാന്‍ ശ്രമിച്ച കേസില്‍ മലയാളി നടി ലീന മരിയ പോളിന് പങ്കുണ്ടോയെന്ന് ഡല്‍ഹി പൊലീസ് ഇപ്പോഴും പരിശോധിക്കുകയാണ്. ടിവി ദിനകരന്റെ നിര്‍ദ്ദേശമനുസിച്ച് ഇടനിലക്കാരനായി പ്രവര്‍ത്തിച്ചെന്ന് ഡല്‍ഹി പൊലീസ് ആരോപിക്കുന്ന സുകേഷിന്റെ ജീവിതപങ്കാളിയാണ് ലീന മരിയ പോള്‍. നിരവധി വഞ്ചനാകേസുകളില്‍ പ്രതിയാണ് ഇവര്‍. ഈ കേസിലെല്ലാം സുകേഷും പ്രതിയാണ്.
സുകേഷ് ചന്ദ്രശേഖറിന്റെ ഉടമസ്ഥതയിലുള്ള 10 ആഡംബര കാറുകള്‍ കൊച്ചിയില്‍ നിന്ന് കഴിഞ്ഞ ദിവസം പിടിച്ചെടുത്തിരുന്നു. ആഡംബരം നിറഞ്ഞ ചുറ്റുപാടുകളിലാണ് ഈ കാറുകള്‍ സൂക്ഷിച്ചിരുന്നതും. പുതുമ നഷ്ടപ്പെടാത്ത കാറുകള്‍ ലംബോര്‍ഗിനി, റോള്‍സ് റോയ്‌സ്, റെയ്ഞ്ച്‌റോവര്‍ തുടങ്ങിയവയാണ്. ഇയെല്ലാം ലീന മരിയ പോളും ഉപയോഗിച്ചിട്ടുണ്ടെന്നാണ് പൊലീസിന്റെ കണ്ടെത്തല്‍. സുകേഷിനെ അറസ്റ്റ് ചെയ്തതിന് പിന്നാലെ ഡല്‍ഹിയില്‍ നിന്ന് ഒരു ബിഎംഡബ്ല്യു കാറും മെഴ്‌സിഡസ് ബെന്‍സും ഇയാളുടേതായി പൊലീസ് കസ്റ്റഡിയിലെടുത്തിരുന്നു. കഴിഞ്ഞ മാസം ബംഗളൂരുവില്‍ നിന്ന് സുകേഷിന്റെ പേരിലുള്ള രണ്ട് ആഡംബരവാഹനങ്ങള്‍ നികുതിവകുപ്പ് പിടിച്ചെടുത്തിരുന്നു. ഈ വാഹനങ്ങളെല്ലാം കള്ളപ്പണം ഉപയോഗിച്ച് സുകേഷ് വാങ്ങിക്കൂട്ടിയതാണെന്ന് നികുതിവകുപ്പ് ഉദ്യോഗസ്ഥര്‍ അറിയിച്ചു. സുകേഷ് ചന്ദ്രശേഖര്‍ ഇപ്പോഴും ജയിലിലാണുള്ളത്.
ബംഗളൂരു സ്വദേശിയായ സുകേഷ് നിരവധി പണമിടപാട് തട്ടിപ്പ് കേസുകളില്‍ പ്രതിയാണ്. 2013ല്‍ ലീന മരിയ പോളിനൊപ്പം സുകേഷും അറസ്റ്റിലായിരുന്നു.
ഐഎഎസ് ഉദ്യോഗസ്ഥ ചമഞ്ഞാണ് ബാങ്കുകാരെ ലീന പറ്റിച്ചത്. പൊലീസ് പിടികൂടിയ ഇവര്‍ പീന്നീട് കോടതി ജാമ്യം അനുവദിച്ചതിനെ തുടര്‍ന്ന് പുറത്തിറങ്ങുകയായിരുന്നു. സുകേഷ് ബംഗലൂരു സ്വദേശിയാണ്. പുറത്തിറങ്ങിയ മരിയ തന്റെ കാമുകനെതിരെ തിരിയുകയായിരുന്നു. ഒരു നടിയാകാനുള്ള മോഹത്താലാണ് സംവിധായകന്‍ ചമഞ്ഞെത്തിയ സുകേഷിനെ പരിചയപ്പെട്ടത്. പിന്നീട് ഇരുവരുടേയും ബന്ധം വേഗത്തില്‍ വളരുകയും ഒന്നിച്ചു ജീവിക്കാന്‍ ആരംഭിക്കുകയും ചെയ്തു. ഭാര്യ ഭര്‍ക്കാക്കന്മാരെ പോലെയാണ് തങ്ങള്‍ കഴിഞ്ഞിരുന്നതെന്നും എന്നാല്‍ കെണിയിലകപ്പെടുത്തുകയായിരുന്നെന്നും മരിയ പറഞ്ഞിരുന്നു. ജീവിതം നശിപ്പിച്ചതിന് കുറ്റങ്ങളെല്ലാം മരിയ സുകേഷിന്റെ തലയില്‍ കെട്ടിവയ്ക്കുകയും ചെയ്തു.
ബിഡിഎസ് ബിരുദധാരിയായ ലീന തൃശ്ശൂര്‍ സ്വദേശിയാണ്. മാതാപിതാക്കള്‍ ദുബായിലാണ്. പിടിയിലാകുന്നതിന് മുമ്പ് രണ്ട് വര്‍ഷത്തോഷം സിനിമ മോഡലിങ് രംഗത്തു പ്രവര്‍ത്തിച്ചു വരികയായിരുന്നു. മലയാള ചിത്രങ്ങളായ കോബ്ര, റെഡ് ചില്ലീസ്, ഹസ്ബന്‍ഡ്‌സ് ഇന്‍ ഗോവ, ജോണ്‍ എബ്രഹാം നായകനായ ഹിന്ദി ചിത്രം മദ്രാസ് കഫെ തുടങ്ങിയ സിനിമകളില്‍ ലീന അഭിനയിച്ചിട്ടുണ്ട്. 2011ല്‍ ലീനയുടെ പരാതിയില്‍ സുകേഷ് അറസ്റ്റിലായിരുന്നു. സിനിമയില്‍ ജോലി വാഗ്ദാനം ചെയ്ത് കബളിപ്പിച്ചെന്നായിരുന്നു ലീനയുടെ പരാതി. എന്നാല്‍ ക്രമേണ ഇവരും ഇയാളുടെ തട്ടിപ്പുകളില്‍ പങ്കാളിയായി.
Post Your Comments