ഫോണ്‍ ബുക്ക്‌ ചെയ്തു ; കിട്ടിയത് തേപ്പുപെട്ടി

11,000 രൂപ വിലയുള്ള ഫോൺ 3250 രൂപയ്ക്ക്- വെഞ്ഞാറമൂട് നിവാസിയായ യുവാവാണ് വാഗ്ദാനത്തിൽ വീണത്. ഫോൺ കോളിലൂടെയായിരുന്നു വാഗ്ദാനം. ‘നിങ്ങളുടെ ഫോൺ നമ്പറിൽനിന്നു കൂടുതൽ ഫോൺ കോൾ ഉള്ളതിനാൽ സമ്മാനമായി കമ്പനി സ്മാർട്ട് ഫോൺ നൽകുന്നു’ – ആദ്യം ഈ വാഗ്ദാനം യുവാവിന് വിശ്വാസ്യയോഗ്യമായി തോന്നിയില്ല. 11,000 രൂപ വിലയുള്ള ഫോൺ 3250 രൂപ അടച്ചാൽ ലഭിക്കുമെന്നുള്ള വാഗ്ദാനം യുവാവ് നിരസിച്ചു. എന്നാല്‍ കുറച്ച് ദിവസം കഴിഞ്ഞപ്പോൾ വീണ്ടും ഫോൺ കോൾ വന്നു. പോസ്റ്റ്‌മാൻ ഫോൺ കൊണ്ടുവരുമ്പോൾ മാത്രം പണം നൽകിയാൽ മതി. യുവാവ് ഫോൺ കട്ടുചെയ്തെങ്കിലും താമസിയാതെ പാഴ്സൽ എത്തി. പണം കൊടുത്തു പാഴ്സൽ വാങ്ങി തുറന്ന യുവാവ് ഞെട്ടി. ഒരിഞ്ചു മാത്രം വലുപ്പമുള്ള, ഓടുകൊണ്ടു നിർമിച്ച നാലുസ്വർണ നിറത്തിലുള്ള ലോക്കറ്റുകളും ഒരു വിരലിന്റെ വലുപ്പമുള്ള സരസ്വതി വിഗ്രഹവും.വെഞ്ഞാറമൂട് പൊലീസിൽ പരാതി നൽകിയിരിക്കുകയാണ് യുവാവ്.

ഇതുപോലെ നിരവധി പേരാണ് ദിവസവും ഓണ്‍ലൈന്‍ തട്ടിപ്പിനിരയാകുന്നത്. പലരും നാണക്കേട് കാരണം തനിയ്ക്ക് പറ്റിയ അബദ്ധം മറച്ചു വെയ്ക്കുന്നവരാന്. വളരെ ചുരുക്കം തട്ടിപ്പുകള്‍ മാത്രമാണ് പുറംലോകം അറിയുന്നത്. എന്തായാലും ഓഫറുകള്‍ എന്ന് കേള്‍ക്കുമ്പോഴേക്കും ചാടി വീഴുന്നതിന് മുമ്പ് ഒന്നാലോചിയ്ക്കുന്നത് നല്ലതാണ്.