ചൈനീസ് പോര്‍ വിമാനങ്ങള്‍ യുഎസ് വിമാനത്തെ തടഞ്ഞു

വാഷിംഗ്ടണ്‍: ചൈനീസ് പോര്‍ വിമാനങ്ങള്‍ യുഎസ് വിമാനത്തെ ആകാശമധ്യേ തടഞ്ഞു. കിഴക്കന്‍ ചൈന കടലിനു മുകളില്‍ നിരീക്ഷണം നടത്തുകയായിരുന്ന യുഎസ് വിമാനത്തെയാണ് തടഞ്ഞത്. രണ്ടു ചൈനീസ് പോര്‍ വിമാനങ്ങള്‍ ചേര്‍ന്ന് യുഎസ് ഇപി-3 എന്ന വിമാനത്തെയാണ് മാര്‍ഗതടസം സൃഷ്ടിച്ചത്. ഒരു ചൈനീസ് വിമാനം യുഎസ് വിമാനത്തിന് ഏതാണ്ട് 300 അടിയോളം അടുത്തുവരെയെത്തിയതായും റിപ്പോര്‍ട്ടുണ്ട്. സംഭവം നടന്നത് ഞായാറാഴ്ചയാണ്.

ചൈനയുടെ രണ്ട് സുഖോയ്-30 വിമാനങ്ങള്‍ ചേര്‍ന്നു കഴിഞ്ഞ മേയിലും മേഖലയില്‍ നിരീക്ഷണം നടത്തുകയായിരുന്ന യുഎസ് വിമാനത്തിനു മാര്‍ഗതടസം സൃഷ്ടിച്ചിരുന്നു. തങ്ങളുടെ അതിര്‍ത്തിയോടു ചേര്‍ന്നു യുഎസ് നടത്തുന്ന നിരീക്ഷണപ്പറക്കലിനോടുള്ള അതൃപ്തിയാണ് ചൈനയുടെ നടപടിക്കു പിന്നിലെന്നാണ് അനുമാനം.