സിഡ്നി: പാര്‍ലമെന്‍റിനുള്ളില്‍ കുഞ്ഞിനെ മുലയൂട്ടിയ സെനറ്റര്‍ രാജിവച്ചു. ഓസ്ട്രേലിയിലാണ് സംഭവം. ഓസ്ട്രേലിയന്‍ സെനറ്ററായ ലാറിസ വാട്ടേഴ്സാണ് രാജിവച്ചത്. കനേഡിയന്‍ പൗരത്വവും ഓസ്ട്രേലിയന്‍ പൗരത്വവുമുള്ള വ്യക്തിയാണ് ലാറിസ വാട്ടേഴ്സ്. ഇതു വിവാദമായതിനാണ് തുടർന്നാണ് രാജി സമർപ്പിച്ചത്.
ഓസ്ട്രേലിയിലെ നിയമനുസരിച്ച് സെനറ്ററാകുന്നയാള്‍ക്ക് ഒന്നിലധികം പൗരത്വം പാടില്ല. സമാന വിഷയത്തിൽ ഗ്രീന്‍സ് പാര്‍ട്ടിയുടെ മറ്റൊരു സെനറ്ററായ സ്കോട്ട് ലുദ്ലാം രാജിവച്ചിരുന്നു. ഈ രാജിക്ക് ശേഷമാണ് തനിക്ക് ഇരട്ടപൗരത്വം ഉള്ളതായി മനസിലാക്കിയതെന്ന് ലാറിസ അറിയിച്ചു.
11 മാസം പ്രായമുള്ള സമയത്താണ് ഓസ്ട്രേലിയന്‍ മാതാപിക്കള്‍ക്കൊപ്പം കാനഡയില്‍നിന്നും നാട്ടിലേക്ക് മടങ്ങിയതാണെന്നും ലാറിസ പറഞ്ഞു. ജനനത്തിലൂടെ പൗരത്വം ലഭിക്കുമെന്ന കാനഡയിലെ നിയമം തനിക്ക് അറിയാല്ലായിരുന്നു. ഇരട്ടപൗരത്വമുള്ള വിവരം അറിഞ്ഞത് ഞെട്ടലോടെയാണ്. അതിനാൽ തന്നെ ഈ സംഭവത്തിൽ പൂര്‍ണ ഉത്തരവാദിത്വം ഏറ്റെടുത്ത് രാജിവയ്ക്കുകയാണെന്ന് ലാറിസ വാര്‍ത്താ സമ്മേളനത്തില്‍ അറിയിച്ചു.
ഓസ്ട്രേലിയന്‍ പാര്‍ലമെന്‍റില്‍ കുഞ്ഞിനെ മുലയൂട്ടിയ സംഭവത്തിലൂടെയാണ് ലാറിസ ലോക ശ്രദ്ധ നേടിയത്. 10 ആഴ്‍ച മാത്രം പ്രായമുള്ള മകള്‍ ആലിയ ജോയിയുമായി ലാറിസ അന്ന് പാര്‍ലമെന്‍റിലെത്തിയത്. മകള്‍ക്ക് വിശന്നപ്പോള്‍ പാര്‍ലമെന്‍റില്‍ സമ്മേളനം നടക്കുന്ന സമയത്ത് തന്നെ ലാറിസ കുഞ്ഞിനെ മുലയൂട്ടുകയായിരുന്നു.
Post Your Comments