ദുബായി പോര്‍ട്ടില്‍ അപകടം

ദുബായി: ദുബായി ജെബല്‍ അലി പോര്‍ട്ടിലുണ്ടായ അപകടത്തില്‍ പത്തുപേര്‍ക്ക് പരിക്കേറ്റു. ഇതില്‍ ഒരാളുടെ നില ഗുരുതരമാണ്.

പോര്‍ട്ടില്‍ അടുത്ത കപ്പല്‍ പോര്‍ട്ടിന്റെ വശത്തുള്ള ഭിത്തിയില്‍ ഇടിച്ചതിനെ തുടര്‍ന്ന് ക്രെയിന്‍ തകര്‍ന്നുവീണാണ് അപകടമുണ്ടായത്. ഗുരുതരമായി പരിക്കേറ്റയാളുടെ കൈയും കാലും ഒടിഞ്ഞ നിലയിലാണ് ആശുപത്രിയില്‍ പ്രവേശിപ്പിച്ചത്.

പോര്‍ട്ടിന്റെ ഒന്നാം ടെര്‍മിനലിലാണ് അപകടമുണ്ടായതെന്ന് ജെബല്‍ അലി തുറമുഖ നടത്തിപ്പുകാരായ ഡി.പി വേള്‍ഡ് വക്താവ് പറഞ്ഞു. അപകടം നടന്ന് നിമിഷങ്ങള്‍ക്കം തന്നെ രക്ഷാപ്രവര്‍ത്തനം ആരംഭിച്ചതായും അപകടത്തില്‍ പരിക്കേറ്റവരെ ആശുപത്രിയിലേക്ക് മാറ്റിയതായും വക്താവ് പറഞ്ഞു. അപകടമുണ്ടായി അഞ്ചുമിനിറ്റിനുള്ളില്‍ തുറമുഖത്തിന്റൈ അപകടം നടന്ന ഭാഗം പുനരുദ്ധരിക്കാനുള്ള ജോലി ആരംഭിച്ചതായും വക്താവ് അറിയിച്ചു.

അപകടത്തില്‍ രണ്ട് ക്രെയിനുകള്‍ക്കാണ് കേടുപാട് പറ്റിയത്. ഇതില്‍ ഒന്ന് ഇവിടെ നിന്ന് നീക്കി. രണ്ടാമത്തെ ക്രെയിന്‍ നന്നാക്കാനുള്ള ശ്രമത്തിലാണ്. അതുവരെ അതിന്റെ പ്രവര്‍ത്തനം നിര്‍ത്തിവച്ചു.