ന്യൂഡല്‍ഹി: ദക്ഷിണേഷ്യന്‍ രാജ്യങ്ങള്‍ക്കായി ഒരു പൊതു ഉപഗ്രഹം വിക്ഷേപിക്കാന്‍ ഇന്ത്യന്‍ ബഹിരാകാശ ഏജന്‍സിയായ ഐ.എസ്.ആര്‍.ഒ ഒരുങ്ങുന്നു. മെയ് ആദ്യവാരമായിരിക്കും വിക്ഷേപണം. എന്നാല്‍ പാകിസ്ഥാന്‍ ഈ പദ്ധതിയുടെ ഭാഗമല്ലെന്ന് ഐഎസ്ആര്‍ഒ ചെയര്‍മാന്‍ എ.എസ് കിരണ്‍ കുമാര്‍ പറഞ്ഞു.
ശ്രീഹരിക്കോട്ടയില്‍ നിന്ന് ജിഎസ്എല്‍വി-9 റോക്കറ്റ് ഉപയോഗിച്ച്‌ വാര്‍ത്താവിനിമയ ഉപഗ്രഹമായ ജിസാറ്റ്-9 ആണ് വിക്ഷേപിക്കുന്നത്‌. 2195 കിലോ വരുന്ന ജിസാറ്റ്-9 ആണ് വിക്ഷേപിക്കുന്നത്‌. 2014ല്‍ കാഡ്മണ്ഡുവില്‍ നടന്ന സാര്ക് ഉച്ചകോടിയിലാണ് ഇന്ത്യന്‍ പ്രധാനമന്ത്രി നരേന്ദ്ര മോദി അയല്‍ക്കാര്‍ക്കുള്ള ഇന്ത്യയുടെ സമ്മാനമെന്ന പേരില്‍ പദ്ധതി പ്രഖ്യാപിച്ചത്.
ആദ്യം സാര്ക് സാറ്റലൈറ്റ് എന്നയിരുന്നു ഈ ഉപഗ്രഹത്തിന്റെ പേരെങ്കിലും പിന്നീട് പാകിസ്ഥാന്‍ പിന്‍മാറിയതോടെ സൗത്ത് ഏഷ്യന്‍ ഉപഗ്രഹം എന്ന് പേര് മാറ്റുകയായിരുന്നു. സൗത്ത് ഏഷ്യന്‍ രാജ്യങ്ങള്‍ക്ക് വാര്‍ത്താ വിനിമയ രംഗത്ത് 12 വര്‍ഷത്തോളം ഈ ഉപഗ്രഹത്തിന്റെ സേവനം ലഭ്യമാകും.
വാര്‍ത്താവിനിമയത്തിനൊപ്പം പ്രകൃതി ദുരന്തത്തെ കുറിച്ചുള്ള മുന്നറിയിപ്പും ഈ ഉപഗ്രഹത്തിലൂടെ രാജ്യങ്ങള്‍ക്ക് ലഭ്യമാകും. ഇതില്‍ നിന്ന് ലഭിക്കുന്ന വിവരങ്ങള്‍ ഈ രാജ്യങ്ങള്‍ക്ക് പരസ്പരം കൈമാറുമെന്നും ഐഎസ്ആര്‍ഒ ചെയര്‍മാന്‍ പറഞ്ഞു.പാകിസ്താനെ ഇതില്‍ ഉള്‍പ്പെടുത്തിയിട്ടില്ല. ഇതില്‍ പങ്കാളികളാകാന്‍ അവര്‍ക്ക് താത്പര്യമില്ലായിരുന്നു-കിരണ്‍കുമാര്‍ പറഞ്ഞു.
Post Your Comments