കേരളത്തില്‍ നിന്ന് ഖത്തറിലേക്ക് ഇനി ഇന്‍ഡിഗോയില്‍ പറക്കാം

തിരുവനന്തപുരം• തിരുവനന്തപുരം, കൊച്ചി, കോഴിക്കോട് എന്നിവിടങ്ങളില്‍ നിന്ന് ഖത്തര്‍ തലസ്ഥാനമായ ദോഹയിലേക്ക് ഇനി ഇന്‍ഡിഗോ എയര്‍ലൈന്‍സില്‍ പറക്കാം. കേരളത്തിലെ മൂന്ന് നഗരങ്ങള്‍ക്ക് പുറമേ മുംബൈ, ഡല്‍ഹി, ചെന്നൈ എന്നിവിടങ്ങളില്‍ നിന്നും കമ്പനി ദോഹയിലേക്ക് പുതിയ സര്‍വീസ് ആരംഭിക്കുന്നുണ്ട്. ഏപ്രില്‍ 15 മുതലാണ് പുതിയ നോണ്‍-സ്റ്റോപ് പ്രതിദിന സര്‍വീസുകള്‍ ആരംഭിക്കുന്നത്.

തിരുവനന്തപുരം-ദോഹ വിമാനം രാവിലെ 6.30 ന് പുറപ്പെട്ട് ഖത്തര്‍ സമയം 8.50 ന് ദോഹയിലെത്തിച്ചേരും. തിരുവനന്തപുരത്തേക്കുള്ള മടക്ക വിമാനം വൈകുന്നേരം 7.10 ന് ദോഹയില്‍ നിന്ന് പുറപ്പെട്ട് ഇന്ത്യന്‍ സമയം പുലര്‍ച്ചെ 2.15 ന് തിരുവനന്തപുരത്തെത്തും.

കൊച്ചി-ദോഹ വിമാനം വൈകുന്നേരം 5.30 ന് പുറപ്പെട്ട് ഖത്തര്‍ സമയം രാത്രി 7.40 ന് ദോഹയിലെത്തിച്ചേരും. മടക്ക വിമാനം രാവിലെ 9.20 ന് ദോഹയില്‍ നിന്ന് പുറപ്പെട്ട് ഇന്ത്യന്‍ സമയം വൈകുന്നേരം 4.30 ന് കൊച്ചിയിലെത്തും.

കോഴിക്കോട്-ദോഹ വിമാനം രാവിലെ 9.05 ന് പുറപ്പെട്ട് ഖത്തര്‍ സമയം രാവിലെ 11 ന് ദോഹയിലെത്തിച്ചേരും. കോഴിക്കോട്ടേക്കുള്ള വിമാനം പുലര്‍ച്ചെ 1.20 ന് ദോഹയില്‍ നിന്ന് പുറപ്പെട്ട് ഇന്ത്യന്‍ സമയം രാവിലെ 6.05 ന് കോഴിക്കോട്ടെത്തും.

എയര്‍ബസ് എ 320-200/നിയോ വിമാനങ്ങള്‍ ഉപയോഗിച്ചാകും സര്‍വീസ്. 180 സീറ്റുകളാകും വിമാനത്തിലുണ്ടാകുക.

ഇന്ത്യയിലെ ഏറ്റവും വലിയ വിമാനക്കമ്പനിയായ ഇന്‍ഡിഗോ 129 വിമാനങ്ങള്‍ ഉപയോഗിച്ച് 41 കേന്ദ്രങ്ങളിലേക്ക് പ്രതിദിനം 815 ലേറെ സര്‍വീസുകള്‍ നടത്തുന്നുണ്ട്.