കണ്ടെയ്നർ ലോറിയിൽ തീപിടുത്തം

കൊച്ചി : എറണാകുളം ചേരാനല്ലൂരിൽ കണ്ടെയ്നർ ലോറി തീ പിടിച്ച് നശിച്ചു. ഉച്ചയ്ക്ക് ഒന്നരമണിയോടെയായിരുന്നു സംഭവം. കണ്ടെയ്നർ നിർത്തിയിട്ടിരുന്നതിന് സമീപത്തെ പുല്ലിന് തീയിട്ടത് പടർന്ന് പിടിച്ചാണ് അപകടം സംഭവിച്ചത്.

കത്തി പടർന്ന തീയ്യിൽ ലോറിയുടെ ഡീസൽ ടാങ്കും ടയറുമെല്ലാം പൊട്ടിത്തെറിച്ചത് നഗരവാസികളെ പരിഭ്രാന്തിയിലാക്കി. ലോറിയിൽ ജീവനക്കാർ ഇല്ലാതിരുന്നതിനാൽ വന്‍ ദുരന്തമാണ് ഒഴിവായത്. കളമശേരിയിൽനിന്ന് സ്ഥലത്തെത്തിയ അഗ്നിമശമന സേനയും പോലീസും അരമണിക്കൂറോളം പ്രയത്നിച്ചാണ് തീയ്യണച്ചത്. ലോറി പൂർണമായും കത്തി നശിച്ചതിനോടൊപ്പം,ലക്ഷക്കണക്കിന് രൂപയുടെ നഷ്ടവും കണക്കാക്കുന്നുണ്ട്.