വാഹനങ്ങൾക്ക് ഇനി മുതൽ ക്യാമറയോ സെൻസറോ നിർബന്ധമാക്കും

ന്യൂഡൽഹി:വണ്ടികൾക്ക് ഇനി കണ്ണാടി മാത്രം പോര ,വണ്ടിക്കു കണ്ണാടിയുണ്ട്എന്നു പറഞ്ഞ് ഇനി രക്ഷപ്പെടാനും പറ്റില്ല.പിൻഭാഗക്കാഴ്ചയ്ക്കു സഹായിക്കുന്ന (റിയർ വ്യൂ) സെൻസറോ ക്യാമറയോ വാഹനങ്ങൾക്കു നിർബന്ധമാക്കാൻ കേന്ദ്രസർക്കാർ തീരുമാനിച്ചിരിക്കുന്നു.അപകടമുണ്ടായാൽ ആഘാതം കുറയ്ക്കാനായി തനിയെ പ്രവർത്തിക്കുന്ന എയർബാഗും നിർബന്ധമാക്കും.ഇതേ സംബന്ധിച്ച് പിൻഭാഗം കാണാൻ സഹായിക്കുന്ന സെൻസറോ ക്യാമറയോ വാഹനത്തിൽ നിർബന്ധമാക്കിക്കൊണ്ടുള്ള വിജ്ഞാപനം ഉടൻ വരും.

വാഹനങ്ങൾക്കെല്ലാം വശങ്ങളിൽ കണ്ണാടിയുണ്ടെങ്കിലും അപകടമൊഴിവാക്കാനും പിന്നിൽ നിൽക്കുന്ന കൊച്ചുകുട്ടികളെയോ റോഡിലെ തടസ്സങ്ങളെയോ കാണാനും ഈ കണ്ണാടി പോരാ എന്നാണ് ഗതാഗത മന്ത്രാലയത്തിന്റെ നിലപാട്.രാജ്യാന്തര റോഡ് ഫെഡറേഷൻ അടുത്ത വർഷം നവംബറിൽ നടത്തുന്ന സമ്മേളനത്തിനു മുന്നോടിയായുള്ള യോഗത്തിൽ, ഗതാഗത മന്ത്രാലയം ജോയിന്റ് സെക്രട്ടറി അഭയ് ദംലെയാണു ഇക്കാര്യം വ്യക്തമാക്കിയത്.