സൗദിയില്‍ തൊഴില്‍ നഷ്ടപ്പെട്ട മലയാളിയെ നാട്ടിലെത്തിച്ചു

തിരുവനന്തപുരം● സൗദി അറേബ്യയില്‍ തൊഴില്‍ നഷ്ടപ്പെട്ട് ദുരിതമനുഭവിച്ച മലയാളിയെ നാട്ടിലെത്തിച്ചു. പത്തനംതിട്ട കോന്നി സ്വദേശി സിജു സാമുവലിനെയാണ് നാട്ടിലെത്തിച്ചത്. കേന്ദ്ര വിദേശകാര്യ മന്ത്രാലയം തിങ്കളാഴ്ച ന്യൂഡല്‍ഹിയില്‍ എത്തിച്ച ഇദ്ദേഹത്തെ വിമാനത്താവളത്തില്‍ കേരള ഹൗസ് ഉദ്യോഗസ്ഥരും നോര്‍ക്ക റൂട്ട്‌സ് അധികൃതരും സ്വീകരിച്ചു. രാത്രി കേരള ഹൗസില്‍ താമസ സൗകര്യം ഒരുക്കി ചൊവ്വാഴ്ച രാവിലെ 11.30 ന് ഇന്‍ഡിഗോ വിമാനത്തില്‍ തിരുവനന്തപുരത്തേക്ക് യാത്രയാക്കുകയായിരുന്നു. ഇദ്ദേഹത്തിന് വിമാന ടിക്കറ്റ് കൂടാതെ വഴി ചെലവിന് 2000 രൂപയും നല്‍കിയതായി നോര്‍ക്ക റൂട്ട്‌സ് അറിയിച്ചു.