താന്‍ മോശക്കാരനാണെന്ന് വരുത്തിതീർത്തത് പാർട്ടി തന്നെയാണെന്ന് കെ ബാബു

തിരുവനന്തപുരം: തന്റെ തെരഞ്ഞെടുപ്പ് പരാജയത്തിന് കാരണം പാർട്ടിയാണെന്ന് കെ .ബാബു. ജനങ്ങൾക്ക് മുന്നിൽ മോശക്കാരൻ എന്ന് മുദ്രകുത്തിയതും പാർട്ടിയാണ്. താന്‍ ജനങ്ങള്‍ക്കിടയില്‍ അപ്രസക്തന്‍ ആയിരുന്നില്ല. മദ്യനയത്തിന്റെ പേരില്‍ കഴിഞ്ഞ സര്‍ക്കാരിനെ മുള്‍ മുനയില്‍ നിര്‍ത്തിയ വ്യക്തികളെയും പ്രസ്ഥാനങ്ങളെയും ഇപ്പോള്‍ കാണാനില്ലെന്നും കെ ബാബു കുറ്റപ്പെടുത്തി.

തന്റെ സങ്കടം പല നേതാക്കളോടും പറഞ്ഞു. പാർട്ടി നേതൃത്വം ഇത് മനസിലാക്കാതിരുന്നത് പാര്‍ട്ടിക്ക് പോലും വേണ്ടാത്തവന്‍ എന്ന് തന്നെ എതിരാളികള്‍ വിശേഷിപ്പിക്കുന്നതിന് കാരണമായെന്നും ഇത് പരാജയത്തിലേക്ക് നയിച്ചെന്നുമാണ് ബാബുവിന്റെ വിശദീകരണം.തന്റെ വൃക്തിബന്ധങ്ങളാണ് തൃപ്പൂണിത്തുറയില്‍ ലഭിച്ച വോട്ടുകളില്‍ ഏറെയും. പാര്‍ട്ടിക്ക് വേണ്ടാത്തവനെന്ന പ്രചാരണം ആ വോട്ടുകള്‍ നഷ്ടപ്പെടുത്തിയെന്നും ബാബു പറഞ്ഞു.