മതവും ജാതിയും മാറ്റിവച്ച് ആത്മീയതയിലൂടെ ഭാരതത്തെ തിരിച്ചറിയാൻ – യോഗ ഗുരു റാം ദേവ്

കോഴിക്കോട് കടപ്പുറത്തു നടന്ന മഹാഭാരതം ധര്‍മരക്ഷാസംഗമം ഉദ്ഘാടനംചെയ്യുകയായിരുന്നു ബാബാ രാംദേവ്.മാതൃരാജ്യത്തെ ബഹുമാനിക്കുകയും ആദരിക്കുകയും ചെയ്യാത്ത ഒരു തത്ത്വശാസ്ത്രത്തെയും അംഗീകരിക്കാന്‍ കഴിയില്ല. പ്രപഞ്ചത്തിലെ എല്ലായിടത്തും മാതൃരാജ്യത്തെ ബഹുമാനിക്കുന്ന സമൂഹമുണ്ട്. അതില്‍ ജാതിയുടെയോ മതത്തിന്റെയോ വിവേചനമില്ല. ഭാരത് മാതാ കീ ജയ് എന്നുറക്കെ വിളിക്കുന്നതു മതത്തിനുവേണ്ടിയല്ല, രാഷ്ട്രത്തിനു വേണ്ടിയാണ്.സ്വദേശിവസ്തുക്കളുടെ പ്രചാരണത്തിന് പ്രാധാന്യം നല്‍കണം. ഒന്നിച്ചുനിന്ന് ബഹുരാഷ്ട്രക്കമ്പനികളുടെ വസ്തുക്കള്‍ ബഹിഷ്‌കരിച്ചാല്‍ കുത്തകക്കമ്പനികളെ നമുക്ക് ശീര്‍ഷാസനത്തില്‍ നിര്‍ത്താന്‍ സാധിക്കും.മയക്കുമരുന്നുകളുംമറ്റും നല്‍കി ജനങ്ങളെ വിദേശകമ്പനികള്‍ രോഗഗ്രസ്തരാക്കുകയും അതിനുള്ള മരുന്ന് അവര്‍തന്നെ വിതരണം ചെയ്യുകയുമാണ് ചെയ്യുന്നത്. യോഗചര്യയിലൂടെ നമ്മുടെ ശരീരത്തെ ആരോഗ്യകരമായി നിലനിര്‍ത്താന്‍ സാധിക്കും. കച്ചവടതാത്പര്യത്താലല്ല, സ്വദേശിവസ്തുക്കളുടെ പ്രചാരണത്തിനും അതുവഴി രാജ്യത്തിന്റെ സമ്പത്ത് രാജ്യത്തിനകത്തുതന്നെ ഉപയോഗിക്കാനുമാണ് താന്‍ ശ്രമിക്കുന്നതെന്നും അദ്ദേഹം പറഞ്ഞു.

.മലയാളത്തില്‍ പ്രസംഗം തുടങ്ങിയ ബാബാ രാംദേവ് ശങ്കരാചാര്യസ്വാമികളുടെയും ഒട്ടനവധി പുണ്യാത്മാക്കളുടെയും ജന്മഭൂമിയായ കേരളത്തെ ആദരിക്കുന്നുവെന്ന് അഭിപ്രായപ്പെട്ടു. ശങ്കരാചാര്യരുടെ പേരില്‍ ഒരു കേന്ദ്രം സ്ഥാപിക്കാനാഗ്രഹിക്കുന്നു. സൂര്യനമസ്‌കാരവും പ്രാണായാമവും പ്രദര്‍ശിപ്പിച്ച ബാബ രാംദേവ്, അത് നിത്യജീവിതത്തിലാചരിച്ചാല്‍ രോഗവിമുക്തരായി നല്ല ജീവിതം നയിക്കാനാവുമെന്നും ഉപദേശിച്ചു.