വാഷിംഗ്ടണ്‍: തെരഞ്ഞെടുപ്പ് പ്രചാരണത്തിനിടെ മഹാത്മാ ഗാന്ധിയെ തെറ്റായി ഉദ്ധരിച്ച് റിപ്പബ്ലിക്കന്‍ സ്ഥാനാര്‍ത്ഥി നോമിനി ഡോണാള്‍ഡ് ട്രംപ് ഇന്‍സ്റ്റഗ്രാമിലൂടെ നടത്തിയ പരാമര്‍ശം വിവാദത്തില്‍. ‘അവര്‍ ആദ്യം നിങ്ങളെ അവഗണിക്കും, പിന്നെ അവര്‍ നിങ്ങളെ പരിഹസിക്കും, പിന്നീട് നിങ്ങളോട് ഏറ്റുമുട്ടും, അപ്പോള്‍ നിങ്ങള്‍ വിജയിക്കും’ എന്നാണ് ഗാന്ധിജി നടത്തിയതെന്ന പേരില്‍ ട്രംപ് പരാമര്‍ശിച്ചത്. എന്നാല്‍ ഗാന്ധിജി ഒരിക്കലും ഒരിടത്തും ഇപ്രകാരം പരാമര്‍ശം നടത്തിയിട്ടില്ലെന്ന് ട്രംപിനെതിരെ അമേരിക്കന്‍ മാധ്യമങ്ങളും റിപ്പബ്ലിക്കന്‍ പാര്‍ട്ടിയിലെ എതിര്‍ചേരിയും രംഗത്തെത്തിയിട്ടുണ്ട്.
തിങ്കളാഴ്ച അലബാമയിലെ പ്രചാരണത്തിന് സമാപനം കുറിച്ചാണ് ട്രംപിന്റെ പോസ്റ്റ്. തന്നെ പിന്തുണയ്ക്കുന്നവര്‍ക്കൊപ്പമുള്ള ചിത്രവും ട്രംപ് ഇസ്റ്റഗ്രാമില്‍ നല്‍കിയിരുന്നു. പാര്‍ട്ടിയിലെ ട്രംപ് വിരുദ്ധ ചേരി തന്നെയാണ് ഇതിനെതിരെ ആദ്യം രംഗത്തുവന്നത്. ഗാന്ധിജി ഇപ്രകാരം ഒരിടത്തും പറഞ്ഞതായി തെളിവില്ലെന്നും അത് അദ്ദേഹത്തിന്റെ പേരില്‍ ചാര്‍ത്തിക്കൊടുക്കുന്നതാണെന്നും രാഷ്ട്രീയ വെബ്‌സൈറ്റായ ദ ഹില്‍ റിപ്പോര്‍ട്ട് ചെയ്യുന്നു.
അതേസമയം, ഈ വാചകം 1918ല്‍ സോഷ്യലിസ്റ്റ് നേതാവായ നിക്കോളാസ് കെയ്ന്‍ ഒരു ട്രേഡ് യൂണിയന്‍ സമ്മേളനത്തില്‍ പറഞ്ഞതാണെന്ന് വെബ്‌സൈറ്റ് പറയുന്നു. എന്നാല്‍ ട്രംപിന്റെ ക്യാംപില്‍ നിന്ന് ഇതു സംബന്ധിച്ച് ഒരു വിശദീകരണവും ഇതുവരെ വന്നിട്ടില്ല.
Post Your Comments