രാജ്യത്ത് കോവിഡ് വ്യാപനം ഏറ്റവും രൂക്ഷം കേരളത്തിലെന്ന് കേന്ദ്രസര്‍ക്കാര്‍

ന്യൂഡല്‍ഹി: രാജ്യത്ത് കൊറോണ വൈറസ് രോഗവ്യാപനം ഏറ്റവും രൂക്ഷം കേരളത്തിലെന്ന് കേന്ദ്രസര്‍ക്കാര്‍. കേരളം ഉള്‍പ്പെടെ പത്ത് സംസ്ഥാന, കേന്ദ്ര ഭരണപ്രദേശങ്ങളിലാണ് പുതിയ കൊറോണ വൈറസ് കേസുകളില്‍ ഭൂരിഭാഗവും റിപ്പോര്‍ട്ട് ചെയ്തിരിക്കുന്നത്. പുതിയ കോവിഡ് കേസുകളില്‍ 76.52 ശതമാനവും ഈ സംസ്ഥാനങ്ങളില്‍ നിന്നാണെന്നും കേന്ദ്ര ആരോഗ്യമന്ത്രാലയം പറയുന്നു.

പുതിയ കൊറോണ വൈറസ് കേസുകളില്‍ ഏറ്റവുമധികം റിപ്പോര്‍ട്ട് ചെയ്തത് കേരളത്തിലാണ്. കഴിഞ്ഞ ദിവസം 3527 കൊറോണ വൈറസ് കേസുകളാണ് കേരളത്തില്‍ റിപ്പോര്‍ട്ട് ചെയ്തിരിക്കുന്നത്. മഹാരാഷ്ട്രയാണ് തൊട്ടുപിന്നില്‍. 2854 കേസുകളാണ് അവിടെ കണ്ടെത്തിയത്. പശ്ചിമ ബംഗാള്‍, ഉത്തര്‍പ്രദേശ്, ഛത്തീസ്ഗഡ്, തമിഴ്‌നാട്, മധ്യപ്രദേശ്, ഗുജറാത്ത് എന്നിവയാണ് കോവിഡ് വ്യാപനം നേരിടുന്ന മറ്റു സംസ്ഥാനങ്ങള്‍.

രോഗമുക്തിയില്‍ 72.37 ശതമാനവും പത്തു സംസ്ഥാന, കേന്ദ്ര ഭരണപ്രദേശങ്ങളില്‍ നിന്നാണ്. രോഗമുക്തിയിലും മുന്നിട്ട് നില്‍ക്കുന്നത് കേരളമാണ്. കഴിഞ്ഞദിവസം 3782 പേരാണ് രോഗമുക്തി നേടിയിരിക്കുന്നത്. പശ്ചിമബംഗാള്‍, ഛത്തീസ്ഗഡ്, മഹാരാഷ്ട്ര, ഉത്തര്‍പ്രദേശ്, മധ്യപ്രദേശ് എന്നി സംസ്ഥാനങ്ങളാണ് തൊട്ടുപിന്നിലെന്ന് സര്‍ക്കാര്‍ കണക്കുകള്‍ പറയുന്നു.