‘പാട്ട് കേൾക്കാൻ പാടില്ല, സിനിമ കാണാൻ പാടില്ല, ഗെയിം കളിക്കാൻ പാടില്ല,ഞാൻ ഇങ്ങനെയായത് അമിത നിയന്ത്രണങ്ങൾ മൂലം’: തൊപ്പി

യുട്യൂബർ തൊപ്പിയെ അറസ്റ്റ് ചെയ്തത് വലിയ ചർച്ചാ വിഷയമാണ് കേരളത്തിൽ. തൊപ്പിയെ അനുകൂലിച്ചും പ്രതികൂലിച്ചും പലരും സോഷ്യൽ മീഡിയയിൽ ഉണ്ട്. ഇതിനിടെ യുവാവിനെ തള്ളിപ്പറഞ്ഞു വീട്ടുകാർ രംഗത്തെത്തി. വീട്ടുകാരുമായി യുവാവിന് യാതൊരു ബന്ധവുമില്ലാത്ത അവസ്ഥയിലാണ്. കണ്ണൂർ മാങ്ങാട്ടാണ് ഇയാളുടെ വീട്. കുറേക്കാലമായി വീട്ടുകാരുമായി നിഹാദ് വലിയ അടുപ്പം പുലർത്തിയിരുന്നില്ലെന്നാണ് റിപ്പോർട്ടുകൾ.

മകനെക്കുറിച്ച് കൂടുതലൊന്നും അറിയില്ലെന്നാണ് വീട്ടുകാരും പറയുന്നത്. മകന് യൂട്യൂബ് ചാനലുള്ളതായി പറഞ്ഞുകേട്ടിട്ടുണ്ടെന്നും എന്നാൽ അതുവഴി നടത്തുന്ന പ്രവർത്തനങ്ങളെ കുറിച്ച് അറിയില്ലെന്നും വീട്ടുകാർ പറയുന്നു. അതേസമയം നാട്ടുകാർ തൊപ്പിയുടെ പ്രവർത്തികളിൽ അമർഷമുള്ളവരാണ്. യുട്യൂബിലൂടെ ആഭാസകരമായ വീഡിയോകൾ ചെയ്യുന്ന തൊപ്പിയുമായി നാടിന് ബന്ധമില്ലെന്നാണ് നാട്ടുകാർ പറയുന്നത്.

നാട്ടിലെ ആരുമായും അങ്ങനെ തൊപ്പിക്ക് ബന്ധമില്ലെന്നും നാട്ടുകാരിൽ ചിലർ വ്യക്തമാക്കുന്നു. തൊപ്പി ഈ നാട്ടുകാരനെന്ന് പറയുന്നത് തന്നെ നാണക്കേടെന്നാണ് ചിലർ ചൂണ്ടിക്കാണിക്കുന്നതും. തൊപ്പിയുടെ തെറിവിളികളും വീഡിയോകളും പിന്നാലെ നടന്ന അറസ്റ്റും വാർത്തയായതോടെ തൊപ്പി എങ്ങനെയാണ് ഇത്തരത്തിലുള്ള പെരുമാറ്റം നടത്തുന്ന വ്യക്തിയായതെന്ന ചോദ്യവും പലരും ഉയർത്തുന്നുണ്ട്. കുട്ടിക്കാലത്ത് വീട്ടുകാരുടെ ശാരീരിക- മാനസിക പീഡനങ്ങൾ ഒട്ടനവധി അനുഭവിച്ചിട്ടുള്ള വ്യക്തിയാണ് തൊപ്പി എന്നു പറയുന്ന നിഹാദെന്നാണ് റിപ്പോർട്ടുകൾ.

നേരത്തെ ഒരു ഓൺലൈൻ ചാനലിനു നൽകിയ അഭിമുഖത്തിൽ തൻ്റെ കുട്ടിക്കാല അനുഭവങ്ങളെ കുറിച്ച് തൊപ്പി വ്യക്തമാക്കിയിട്ടുണ്ട്. നിയന്ത്രണങ്ങൾ ആവശ്യത്തിലധികമുള്ള വീടായിരുന്നു തൻ്റേതെന്നാണ് തൊപ്പി പറയുന്നത്. പാട്ട് കേൾക്കാൻ പാടില്ല, സിനിമ കാണാൻ പാടില്ല, ഗെയിം കളിക്കാൻ പാടില്ല. ഭീകരമായ മതപരമായ ചുറ്റുപാട് ആയിരുന്നു. അങ്ങിനെയാണ് ഞാനൊരിക്കൽ ഒരു കടയിൽ കയറി പണം മോഷ്‌ടിക്കുന്നതെന്ന ഞെട്ടിക്കുന്ന വെളിപ്പെടുത്തലും തൊപ്പി നടത്തിയിട്ടുണ്ട്.

സ്കൂൾ അധ്യാപകനായിരുന്ന പിതാവ് എല്ലാത്തിനും എതിരായിരുന്നു എന്നാണ് തൊപ്പി പറയുന്നത്. പാട്ട് കേൾക്കാൻ പാടില്ല, സിനിമ കാണാൻ പാടില്ല, ഗെയിം കളിക്കാൻ പാടില്ല. ഭീകരമായ മതപരമായ ചുറ്റുപാട് ആയിരുന്നു. സ്വന്തം ആവശ്യങ്ങൾക്കു പണം ചോദിച്ചാൽ‌ വീട്ടിൽനിന്നു കിട്ടുമായിരുന്നില്ലെന്നും തൊപ്പി വ്യക്തമാക്കുന്നു. അങ്ങനെയാണ് ഒൻപതാം ക്ലാസിൽ പഠിക്കുമ്പോൾ ഒരു ഗെയിമിനു വേണ്ടി കടയിൽ നിന്ന് പണം മോഷ്ടിക്കുന്നത്. മോഷ്ടിച്ച് ഇറങ്ങിയോടുന്നതിനിടെ പണം വഴിയിൽ കളഞ്ഞുപോയി. നാട്ടുകാർ ഓടിച്ചിട്ടുപിടിച്ച് കെട്ടിയിട്ടു. അതോടെ പിതാവ് അവനെ സ്കൂളിൽനിന്നു പുറത്താക്കി. പത്താം ക്ലാസിൽ പുതിയ സ്കൂളിലെത്തിയെങ്കിലും അവിടെയും പല പ്രശ്നങ്ങളുമുണ്ടായതോടെ പഠിപ്പു നിർത്തുകയായിരുന്നു.

പിന്നെ വല്ലാത്തൊരു ജീവിതമായിരുന്നു. പഠനം നിർത്തി വീട്ടിലിരിപ്പായതോടെ പുറം ലോകവുമായുള്ള ബന്ധങ്ങൾ അവസാനിച്ചു. പിന്നെ ഓൺലൈൻ ഗെയിമിൽ ശ്രദ്ധിക്കാൻ ആരംഭിച്ചു. ആരും ചേദിക്കാനും പറയാനുമില്ലാത്ത ജീവിതം. രാവിലെ എഴുന്നേൽക്കും, ഭക്ഷണം കഴിക്കും, കിടന്നുറങ്ങും. അത്രമാത്രം. വർഷങ്ങളായി പിതാവിനോടു സംസാരിച്ചിട്ടില്ലെന്നും തൊപ്പി പറയുന്നു. കൂട്ടുകാർ എടുത്തു പറയാൻ ആരുമില്ല, ഉണ്ടായിരുന്നവർ തള്ളിപ്പറഞ്ഞു. ഇതോടെ തൊപ്പി ആകെ തളർന്നു. തുടർന്ന് വിഷാദരോഗത്തിലേക്ക് വഴുതി വീണു. വർഷങ്ങൾ കഴിഞ്ഞാണ് തൊപ്പിയുടെ വിഷാദരോഗത്തിന് ചെറുതായിട്ടാണെങ്കിലും മാറ്റങ്ങൾ ഉണ്ടായതെന്നാണ് പുറത്തു വരുന്ന റിപ്പോർട്ടുകൾ.

കഴിഞ്ഞ ദിവസം പുലർച്ചെയാണ് തൊപ്പിയെ പൊലീസ് കസ്റ്റഡിയിൽ എടുത്തത്. എറണാകുളം എടത്തലയിലെ താമസസ്ഥലത്ത് നിന്നാണ് യുവാവിനെ പൊലീസ് പിടികൂടിയത്. ഫ്ളാറ്റിന് പുറത്തെത്തി പൊലീസ് ആവശ്യപ്പെട്ടെങ്കിലും യുവാവ് വാതിൽ തുറക്കാൻ തയ്യാറായില്ല. തുടർന്ന് വാതിൽ ചവിട്ടിപ്പൊളിച്ചാണ് പൊലീസ് ഇയാളെ കസ്റ്റഡിയിലെടുത്തത്. തുടർന്ന് വളാഞ്ചേരി പൊലീസ് സ്റ്റേഷനിലെത്തിക്കുകയായിരുന്നു. വെെകുന്നേരത്തോടെ യുവാവിനെ സ്റ്റേഷൻ ജാമ്യത്തിൽ പൊലീസ് വിട്ടയച്ചു.