കൊല്‍ക്കത്ത: പിതാവിന്റെ കാമുകിയെ ചായക്കടയിലിട്ട് കുത്തിക്കൊലപ്പെടുത്തി മകന്‍. 16 കാരനായ മകനാണ് അച്ഛന്റെ മുന്നിലിട്ട് 24കാരിയായ കാമുകിയെ കൊലപ്പെടുത്തിയത്. കൊല്‍ക്കത്തയിലാണ് സംഭവം. ഇഎം ബൈപാസ് റോഡിലുള്ള ചായക്കടയില്‍ വച്ച് വ്യാഴാഴ്ച രാത്രി ഒന്‍പതു മണിയോടെയാണ് കൊലപാതകം നടന്നത്. സംഭവത്തില്‍ 16 കാരനേയും മാതാവിനേയും കൂടെയുണ്ടായിരുന്ന 22 കാരനെയും പൊലീസ് അറസ്റ്റ് ചെയ്തു.
കിഴക്കന്‍ കൊല്‍ക്കത്തയിലെ തിരക്കേറിയ സ്ഥലത്തുവെച്ചാണ് യുവതിയെ കൊലപ്പെടുത്തിയത്. പിതാവിന് 24 കാരിയുമായി ബന്ധമുള്ളത് അറിഞ്ഞ മകന്‍ കാറിന്റെ ജിപിഎസ് പിന്തുടര്‍ന്നാണ് ഇരുവരുമുള്ള ചായക്കടയില്‍ എത്തിയതെന്ന് പൊലീസ് പറഞ്ഞു. ചായക്കടയിലെത്തിയ 16 കാരനും മാതാവും കണ്ടത് കാമുകിക്കൊപ്പം ഇരിക്കുന്ന അച്ഛനെയാണ്. ഇതോടെ പ്രകോപിതനായ മകന്‍ അച്ഛന്റെ കാമുകിയെ മൂര്‍ച്ചയേറിയ ആയുധമുപയോഗിച്ച് കൊലപ്പെടുത്തുകയായിരുന്നുവെന്ന് പൊലീസ് പറഞ്ഞു.
ചായക്കടക്ക് പുറത്ത് കാറിലിരുന്ന് ചായകുടിക്കുകയായിരുന്നു പിതാവും കാമുകിയും. ഇവിടേക്ക് ഇവരെ പിന്തുടര്‍ന്ന് മറ്റൊരു കാറില്‍ മകനും മാതാവുമെത്തി. കൂടെ സഹായിയായി 24 കാരനുമുണ്ടായിരുന്നു. അച്ഛനേയും കാമുകിയേയും ഒരുമിച്ച് കണ്ടതോടെ 16 കാരന്‍ പാഞ്ഞെത്തി യുവതിയെ കാറില്‍ നിന്നും വലിച്ച് പുറത്തിറക്കി. പിന്നീട് കൈയ്യില്‍ കരുതിയിരുന്ന ആയുധം ഉപയോഗിച്ച് കുത്തിക്കൊലപ്പെടുത്തുകയായിരുന്നു. ഗുരുതരമായി പരിക്കേറ്റ യുവതിയെ ഉടന്‍തന്നെ ആശുപത്രിയില്‍ എത്തിച്ചെങ്കിലും മരിച്ചു.
പിതാവിന്റെ അവിഹിത ബന്ധം മനസിലായതോടെ പതിനാറുകാരനും അമ്മയും ചേര്‍ന്ന് കൊലപാതകത്തിന് പദ്ധതിയിട്ടിരുന്നുവെന്ന് പൊലീസ് ചോദ്യം ചെയ്യലിന് ശേഷം പറഞ്ഞു. പ്രതിക്ക് പ്രായപൂര്‍ത്തിയാകാത്തതിനാല്‍ ആരുടേയും പേരുവിരങ്ങള്‍ വെളിപ്പെടുത്താനാകില്ലെന്നും പൊലീസ് വ്യക്തമാക്കി. അതേസമയം സംഭവത്തിന് പിന്നാലെ 16 കാരന്റെ പിതാവ് രക്ഷപ്പെട്ടെന്നും ഇയാള്‍ക്കായി അന്വേഷണം നടത്തി വരികയാണെന്നും പൊലീസ് പറഞ്ഞു.
Leave a Comment