തിരുവനന്തപുരം: പി.എസ്.സി പരീക്ഷാ കേന്ദ്രത്തിലെ ആള്‍മാറാട്ടത്തിനു പിന്നിലെ മുഖ്യ ആസൂത്രകന്‍ നേമം സ്വദേശിയായ അമല്‍ജിത്താണെന്ന് പൂജപ്പുര പോലീസ്. ഇയാള്‍ ഒളിവിലാണ്. ഇയാള്‍ക്ക് വേണ്ടി അന്വേഷണം ഊര്‍ജിതമാക്കിയെന്ന് പോലീസ് പറഞ്ഞു.
ബുധനാഴ്ച രാവിലെ ഏഴരയോടെയാണ് പൂജപ്പുരയിലെ ചിന്നമ്മ മെമ്മോറിയല്‍ ഗേള്‍സ് ഹൈസ്‌കൂളിലെ പരീക്ഷ കേന്ദ്രത്തില്‍ നിന്നും പരീക്ഷ എഴുതാനെത്തിയ ഉദ്യോഗാര്‍ത്ഥി ഇറങ്ങിയോടിയത്. യൂണിവേഴ്‌സിറ്റി ലാസ്റ്റ് ഗ്രേഡ് സെര്‍വെന്റ്‌സ് മെയിന്‍ പരീക്ഷ കേന്ദ്രത്തിലായിരുന്നു സംഭവം നടന്നത്.
ബയോമെട്രിക് സംവിധാനത്തിലൂടെ ഹാള്‍ടിക്കറ്റ് പരിശോധിക്കുന്നതിനിടെയാണ് ഉദ്യോഗാര്‍ത്ഥി പരീക്ഷാ കേന്ദ്രത്തിലെ മതില്‍ ചാടികടന്ന് രക്ഷപ്പെട്ടത്. അമല്‍ജിത്തിന് വേണ്ടി ആള്‍മാറാട്ടം നടത്തി പരീക്ഷ എഴുതാനെത്തിയ യുവാവാണ് രക്ഷപ്പെട്ടതെന്ന് പോലീസ് പറഞ്ഞു.
റോഡില്‍ ബൈക്കില്‍ കാത്ത് നിന്നത് അമല്‍ജിത്തായിരുന്നുവെന്നും ഇയാളുടെ വാഹനത്തിലാണ് പരീക്ഷ എഴുതാനെത്തിയ യുവാവ് രക്ഷപ്പെട്ടതെന്നും പോലീസ് പറഞ്ഞു. സിസിടിവി ദൃശ്യങ്ങള്‍ കേന്ദ്രീകരിച്ച് പോലീസ് അന്വേഷണം ഊര്‍ജിതമാക്കി.
Post Your Comments