റിയൽമിയുടെ റിയൽമി നാർസോ 60 5ജി സീരീസ് ഉടൻ ഇന്ത്യൻ വിപണിയിൽ അവതരിപ്പിക്കാൻ സാധ്യത. ഒട്ടനവധി സവിശേഷതകൾ ഉൾകൊള്ളിച്ചിട്ടുള്ള ഈ സ്മാർട്ട്ഫോൺ സീരീസിന്റെ ടീസർ കമ്പനി പുറത്തുവിട്ടിട്ടുണ്ട്. റിയൽമി മൈക്രോസൈറ്റ് മുഖാന്തരമാണ് വിവരങ്ങൾ പങ്കുവെച്ചിരിക്കുന്നത്. സ്മാർട്ട്ഫോണിന്റെ കൂടുതൽ വിശദാംശങ്ങൾ ജൂലൈ 22, ജൂലൈ 26 എന്നീ തീയതികളിൽ വെളിപ്പെടുത്തുന്നതാണെന്ന് കമ്പനി അറിയിച്ചു. അതേസമയം, ലോഞ്ചുമായി ബന്ധപ്പെട്ട ഔദ്യോഗിക തീയതി ഇതുവരെ പുറത്തുവിട്ടിട്ടില്ല. ഈ സ്മാർട്ട്ഫോണിൽ പ്രതീക്ഷിക്കാവുന്ന സവിശേഷതകൾ എന്തൊക്കെയെന്ന് പരിചയപ്പെടാം.
6.43 ഇഞ്ച് ഫുൾ എച്ച്ഡി പ്ലസ് സൂപ്പർ അമോലെഡ് ഡിസ്പ്ലേ, 90 ഹെർട്സ് റിഫ്രഷ് റേറ്റ് എന്നിവയാണ് പ്രതീക്ഷിക്കുന്നത്. മീഡിയടെക് ഡെമൻസിറ്റി 6020 പ്രോസസറാണ് നൽകാൻ സാധ്യത. 64 മെഗാപിക്സൽ പ്രൈമറി ക്യാമറയും, 2 മെഗാപിക്സൽ പോട്രെയിറ്റ് ലെൻസും നൽകിയേക്കും. 8 മെഗാപിക്സൽ സെൽഫി ക്യാമറയാകാനാണ് സാധ്യത. 8 ജിബി റാം പ്ലസ് 256 ജിബി ഇന്റേണൽ സ്റ്റോറേജ് വേരിയന്റിൽ പുറത്തിറക്കുന്ന റിയൽമി നാർസോ 60 സീരീസിന്റെ വില സംബന്ധിച്ച വിവരങ്ങൾ കമ്പനി പുറത്തുവിട്ടിട്ടില്ല.
Post Your Comments