ന്യൂഡൽഹി: നിതീഷ് കുമാർ വീണ്ടും ബിജെപിയോട് അടുക്കുന്നതായി സൂചനകൾ. ജെഡിയു, ആർജെഡി കക്ഷികൾക്ക് ഇടയിൽ ഭിന്നതയെന്ന ഊഹാപോഹങ്ങൾ ശക്തമാകുമ്പോൾ, പ്രത്യേകിച്ചും ബിഹാർ മുഖ്യമന്ത്രി നിതീഷ് കുമാറിന്മേൽ തേജസ്വി യാദവിന് അധികാരം കൈമാറാൻ ആർജെഡി സമ്മർദം ചെലുത്തുന്ന സാഹചര്യത്തിലാണ് അഭ്യൂഹങ്ങൾ ശക്തമാവുന്നത്. ആർജെഡിയുമായി സഖ്യത്തിലേർപ്പെട്ടതോടെ ബീഹാറിൽ അക്രമസംഭവങ്ങൾ തുടർക്കഥ ആകുകയാണ്. സർക്കാർ ഭൂമിയിൽ സ്‌മാരകം പണിയുന്നതിന്റെ പേരിൽ ഗാൽവാൻ രക്തസാക്ഷി ജയ് കിഷോർ സിംഗിന്റെ പിതാവിനെ ബീഹാർ പോലീസ് മർദിക്കുകയും അപമാനിക്കുകയും ജയിലിലടക്കുകയും ചെയ്‌ത വിഷയത്തിൽ നിതീഷ് കുമാർ തേജസ്വി യാദവിൽ നിന്ന് വ്യത്യസ്‌തമായ കാഴ്‌ചപ്പാടാണ് സ്വീകരിച്ചത്.
പോലീസും പ്രാദേശിക ഉദ്യോഗസ്ഥരും സ്വീകരിച്ച നടപടികൾ ശരിയാണെന്ന് തേജസ്വി പ്രഖ്യാപിച്ചപ്പോൾ, നിതീഷ് കുമാർ വിഷയത്തിൽ അന്വേഷണത്തിന് ഉത്തരവിടുകയും രക്തസാക്ഷിയുടെ പിതാവ് എന്തിനാണ് വിഷമിച്ചതെന്ന് അന്വേഷിക്കണമെന്ന് വാദിക്കുകയും ചെയ്‌തു. ഒരു ദിവസത്തിനുശേഷം, നിതീഷ് അന്വേഷണത്തിന് ഉത്തരവിട്ടു, തുടർന്ന് രക്തസാക്ഷിയുടെ പിതാവിന് കോടതി ജാമ്യം അനുവദിച്ചു.അടുത്തിടെ അന്തരിച്ച മുൻ ബിഹാർ ഉപമുഖ്യമന്ത്രി തർ കിഷോർ പ്രസാദിന്റെ പിതാവിന്റെ ‘ശ്രാദ്ധ കർമ്മ’ത്തിൽ പങ്കെടുക്കാൻ ശനിയാഴ്‌ച നിതീഷ് കുമാർ കതിഹാർ സന്ദർശിച്ചിരുന്നു. രാഷ്ട്രീയ സ്വയംസേവക് സംഘ് (ആർഎസ്എസ്) അംഗമാണ് പ്രസാദ്, അഖില ഭാരതീയ വിദ്യാർത്ഥി പരിഷത്ത് (എബിവിപി) യിൽ നിന്നാണ് രാഷ്ട്രീയ ജീവിതം ആരംഭിച്ചത്. 2020-ലെ ബിഹാർ നിയമസഭാ തിരഞ്ഞെടുപ്പിൽ ബിഹാർ നിയമസഭയിലെ ബി.ജെ.പിയുടെ നേതാവായി തിരഞ്ഞെടുക്കപ്പെട്ട അദ്ദേഹം കതിഹാർ നിയോജകമണ്ഡലത്തിൽ നിന്ന് ബിഹാർ നിയമസഭാംഗമായും തിരഞ്ഞെടുക്കപ്പെട്ടു. ഇങ്ങനെ സഖ്യ സാധ്യതകൾക്കുള്ള നിരവധി സൂചനകളാണ് ഇപ്പോൾ പുറത്ത് വരുന്നത്.
ആർജെഡിയുടെയും മറ്റ് ഘടകകക്ഷികളുടെയും സഹായത്തോടെ ബിഹാറിൽ മഹാസഖ്യത്തിന്റെ സർക്കാർ രൂപീകരിക്കാൻ വേണ്ടി കഴിഞ്ഞ വർഷം നിതീഷ് എൻഡിഎ വിട്ടത് മുതൽ ബിജെപിയും ജെഡിയുവും പരസ്‌പരം രൂക്ഷമായ ആക്രമണങ്ങൾ അഴിച്ചുവിടുകയായിരുന്നു. തുടക്കത്തിൽ നിതീഷിന് തിരിച്ചുവരവിനുള്ള അവസരങ്ങൾ നൽകാൻ ബിജെപി മുതിർന്നെങ്കിലും അത് ഫലിക്കാതെ വന്നപ്പോൾ അദ്ദേഹത്തിനെതിരെ തിരിയുകയായിരുന്നു. ഇത്തരം രാഷ്ട്രീയ സംഘർഷങ്ങൾക്ക് ശേഷവും ബിഹാർ മുഖ്യമന്ത്രി കാവി പാർട്ടിയുമായുള്ള അനുരഞ്ജനത്തിന്റെ സൂചനകൾ തുറന്നിടുന്നുണ്ട്.
Post Your Comments