മലപ്പുറം: പാര്‍ട്ടിക്ക് വഴങ്ങിയില്ല, ഹരിത നേതാക്കള്‍ക്കെതിരെ കര്‍ശന നടപടി സ്വീകരിച്ച് മുസ്ലീം ലീഗ്. എംഎസ്എഫിന്റെ വനിതാ വിഭാഗമായ ഹരിത സംസ്ഥാന കമ്മിറ്റി പിരിച്ചു വിട്ടു. ലീഗിന്റെ ഉന്നതാധികാര സമിതി യോഗമാണ് കമ്മിറ്റി പിരിച്ചു വിട്ടത്. നേതാക്കള്‍ ഗുരുതരമായ അച്ചടക്ക ലംഘനമാണ് നടത്തിയതെന്ന് ലീഗ് സംസ്ഥാന ജനറല്‍ സെക്രട്ടറി പിഎംഎ സലാം പറഞ്ഞു. പാര്‍ട്ടിയുടെ തീരുമാനത്തിന് വഴങ്ങാത്ത കമ്മിറ്റിയുമായി മുന്നോട്ടു പോകാനാകില്ലെന്നും അദ്ദേഹം വ്യക്തമാക്കി. ഒപ്പം പാര്‍ട്ടിക്ക് വഴങ്ങാത്ത ഹരിത നേതാക്കള്‍ക്കെതിരെ കര്‍ശന നിലപാട് സ്വീകരിച്ചുവെന്നും അദ്ദേഹം പറഞ്ഞു. ലൈംഗിക അധിക്ഷേപം നടത്തിയെന്ന പരാതി നല്‍കിയവര്‍ക്ക് എതിരെയാണ് ലീഗ് നേതൃത്വം ഇപ്പോള്‍ നടപടി സ്വീകരിച്ചിരിക്കുന്നത്.
എംഎസ്എഫ് നേതാക്കള്‍ക്കെതിരെ ഹരിത നേതാക്കള്‍ നല്‍കിയ ലൈംഗിക അധിക്ഷേപ പരാതി പിന്‍വലിക്കണമെന്ന ആവശ്യം ലീഗ് നേതൃത്വം നേരത്തെ മുന്നോട്ടുവച്ചിരുന്നു. എന്നാല്‍ വനിതാ കമ്മീഷന് നല്‍കിയ പരാതി പിന്‍വലിക്കാന്‍ ഹരിത നേതാക്കള്‍ തയ്യാറായിട്ടില്ല. പരാതി പിന്‍വലിക്കാതെ ചര്‍ച്ചയുമായി മുന്നോട്ടു പോകില്ലെന്ന് നേതൃത്വം നേരത്തെ വ്യക്തമാക്കിയിരുന്നു. ഇതോടെയാണ് കടുത്ത നടപടി. പ്രശ്‌നം രമ്യമായി പരിഹരിക്കാനുള്ള പല ശ്രമങ്ങളും പാര്‍ട്ടി നടത്തിയെന്ന് പിഎംഎ സലാം പറഞ്ഞു.
Post Your Comments