പ്രീമിയർ ലീഗിൽ നോർവിച്ച് സിറ്റിയെ തകർത്ത് മാഞ്ചസ്റ്റർ സിറ്റി

മാഞ്ചസ്റ്റർ: പ്രീമിയർ ലീഗിൽ പുതിയ സീസണിലെ രണ്ടാം മത്സരത്തിൽ തകർപ്പൻ ജയവുമായി നിലവിലെ ചാമ്പ്യന്മാരായ മാഞ്ചസ്റ്റർ സിറ്റി. നോർവിച്ച് സിറ്റിയെ എതിരില്ലാത്ത അഞ്ചു ഗോളിനാണ് സിറ്റി തകർത്തത്. പ്രീമിയർ ലീഗിലെ ആദ്യ മത്സരത്തിൽ സിറ്റി ടോട്ടനത്തിനോട് പരാജയപ്പെട്ടിരുന്നു. ജയത്തോടെ രണ്ടു മത്സരങ്ങളിൽ നിന്ന് മൂന്നു പോയിന്റുമായി സിറ്റി ആറാം സ്ഥാനത്താണ്.

മത്സരത്തിന്റെ ആദ്യ പകുതിയിലെ ഏഴാം മിനിറ്റിൽ തന്നെ നിലവിലെ ചാമ്പ്യന്മാർ കളിയിലെ ആധിപത്യം പിടിച്ചെടുത്തു. ടിം ക്രൂലിന്റെ സെൽഫ് ഗോളാണ് സിറ്റിക്ക് ആദ്യ ഗോൾ സമ്മാനിച്ചത്. ഗബ്രിയേൽ ജെസ്യുസിന്റെ ഷോട്ട് തടയാൻ ശ്രമിച്ച ക്രൂലിന്റെ പിഴവിൽ നിന്ന് പന്ത് വലയിലെത്തുകയായിരുന്നു. 22-ാം മിനിറ്റിൽ സൂപ്പർ താരം ജാക്ക് ഗ്രീലിഷ് സിറ്റിയുടെ ലീഡുയർത്തി.

Read Also:- ഓണവിപണി ലക്ഷ്യമിട്ട് വിലക്കിഴിവുകൾ പ്രഖ്യാപിച്ച് ലെനോവോ

രണ്ടാം പകുതിയിലെ 64-ാം മിനിറ്റിൽ ഹെമമെറിക് ലപോർട്ടെയിലൂടെ സിറ്റി വീണ്ടും ലീഡുയർത്തി. 71-ാം മിനിറ്റിൽ ഗബ്രിയേൽ ജെസ്യുസിന്റെ പാസിൽ റഹീം സ്റ്റെർലിങ് സിറ്റിക്കായി നാലാം ഗോൾ നേടി. മത്സരത്തിന്റെ 84-ാം മിനിറ്റിൽ റിയാദ് മഹ്റെസിലൂടെ മാഞ്ചസ്റ്റർ സിറ്റി ഗോൾ പട്ടിക തികച്ചു.