കാറിൽ തട്ടി നിയന്ത്രണം വിട്ട് റോഡിൽ വീണ ബൈക്ക് യാത്രക്കാരന്റെ ദേഹത്ത് ബസ് കയറി ദാരുണാന്ത്യം

കോട്ടയം; കാറിൽ തട്ടി നിയന്ത്രണം വിട്ട് റോഡിൽ വീണ ബൈക്ക് യാത്രക്കാരൻ പിന്നാലെ എത്തിയ ബസ് കയറി ദാരുണാന്ത്യം. മാധവൻപടി – റബർ ബോർഡ് റോഡിനു സമീപം വാടകയ്ക്ക് താമസിക്കുന്ന പെരുമ്പാവൂർ, ഒക്കൽ, കപ്രക്കാട്ടിൽ കെ.ആർ. ജോയി (52) ആണ് ദാരുണമായി മരിച്ചിരിക്കുന്നത്. താന്നിക്കൽപടിയിൽ പ്രവർത്തിക്കുന്ന സ്വകാര്യ റബർ ഫാക്ടറി മാനേജരാണ് ജോയി. ഇന്നലെ ഉച്ചയ്ക്ക് 1.30ന് ആയിരുന്നു അപകടം ഉണ്ടായിരിക്കുന്നത്. ഫാക്ടറിയിൽ നിന്ന് ഉച്ചഭക്ഷണം കഴിക്കാനായി വീട്ടിലേക്ക് ബൈക്കിൽ പോകുകയായിരുന്നു ജോയി. ‌

മാധവൻപടി ഭാഗത്താണ് ബൈക്ക് കാറിൽ തട്ടി നിയന്ത്രണം വിട്ടത്. കാറിന്റെ അൽപം മുൻപിലേക്കു തെറിച്ചു വീണ ജോയിയുടെ ശരീരത്തിൽ പിന്നാലെ വന്ന ബസിന്റെ മുൻചക്രം കയറുകയുണ്ടായി. ഉടൻ മണർകാട് സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കാറും കോട്ടയം – എസ്എൻ പുരം റൂട്ടിൽ സർവീസ് നടത്തുന്ന ബസും പൊലീസ് പിടിച്ചെടുത്തു.

നിർത്തിയിട്ടിരുന്ന കാർ മുന്നോട്ട് എടുത്തപ്പോൾ ബൈക്ക് ഇതിൽ തട്ടി നിയന്ത്രണം വിടുകയായിരുന്നോ എന്ന് അന്വേഷിച്ച് വരികയാണെന്ന് മണർകാട് പൊലീസ് അറിയിച്ചു. അതേസമയം, ഭക്ഷണം വാങ്ങി കാറിൽ കയറിയപ്പോഴാണ് അപകടമുണ്ടായതെന്നും കാർ സ്റ്റാർട്ടാക്കുന്നതിനു മുൻപേ ബൈക്ക് കാറിൽ തട്ടിയെന്നുമാണ് കാർ ഉടമ പറയുന്നത്. കോവിഡ് പരിശോധനയും പോസ്റ്റ്മോർട്ടവും കഴിഞ്ഞ് മൃതദേഹം ബന്ധുക്കൾക്ക് വിട്ടുനൽകും.ഭാര്യ: രശ്മി. മക്കൾ: മീര, മേഘ.