മലപ്പുറം: ഇന്ദിരയെ മറന്ന്, പട്ടേലിനെ അനുസ്മരിച്ച്‌ കെ.എസ്.ആര്‍.ടി.സി മലപ്പുറം ഡിപ്പോ. മുന്‍ പ്രധാനമന്ത്രി ഇന്ദിര ഗാന്ധിയുടെ ചരമദിനത്തില്‍ പുനരര്‍പ്പണ പ്രതിജ്ഞ സംഘടിപ്പിക്കാതെ കെ.എസ്.ആര്‍.ടി.സി മലപ്പുറം ഡിപ്പോ അധികൃതര്‍. ഇന്ദിര ഗാന്ധി രക്തസാക്ഷിയായതും സര്‍ദാര്‍ പട്ടേല്‍ ജനിച്ചതും ഒക്ടോബര്‍ 31നാണ്. എന്നാൽ ഇതേദിവസംതന്നെ പ്രഥമ ആഭ്യന്തരമന്ത്രി സര്‍ദാര്‍ വല്ലഭ് ഭായി പട്ടേലി‍െന്‍റ ജന്മദിനം ഐക്യദിനമായി ആചരിക്കുകയും ചെയ്തു. ചീഫ് ഓഫിസ്, ഡിപ്പോ, സബ് ഡിപ്പോ, വര്‍ക് ഷോപ് എന്നിവിടങ്ങളിലെല്ലാം ശനിയാഴ്ച രാവിലെ രണ്ട് പരിപാടികളും നടത്തണമെന്ന് ഭരണവിഭാഗം എക്സിക്യൂട്ടിവ് ഡയറക്ടറുടെ ഉത്തരവിറങ്ങിയിരുന്നു. എന്നാല്‍, മലപ്പുറം ഡിപ്പോയില്‍ പട്ടേല്‍ ജന്മദിനാചരണം മാത്രമാണ് സംഘടിപ്പിച്ചത്.
Read Also: കേന്ദ്രസര്‍ക്കാര്‍ നയങ്ങള്‍ക്കെതിരെ; പ്രക്ഷോഭങ്ങള്‍ക്ക്‌ പൂര്‍ണപിന്തുണ: സിപിഐഎം
ഇന്ദിരാ ഗാന്ധിയെ അനുസ്മരിക്കുന്നതിന് പുനരര്‍പ്പണദിനത്തില്‍ രാവിലെ 10.15 മുതല്‍ രണ്ട് മിനിറ്റ് നേരം വാഹനനീക്കം ഉള്‍പ്പെടെ എല്ലാം നിര്‍ത്തിവെച്ച്‌ മൗനാചരണം, തുടര്‍ന്ന് പ്രതിജ്ഞ, ദേശീയഗാനം എന്നിവ നടത്താനായിരുന്നു നിര്‍ദേശം. 10.30ന് പട്ടേല്‍ സ്മരണയില്‍ ദേശീയ ഐക്യദിന പ്രതിജ്ഞ ചൊല്ലണമെന്ന ഉത്തരവുമുണ്ടായിരുന്നു. എന്നാല്‍, പുനരര്‍പ്പണ പ്രതിജ്ഞ‍യുടെ ഉത്തരവ് മലപ്പുറം ഡിപ്പോയില്‍ വന്നിട്ടില്ലെന്നാണ് അധികൃതര്‍ നല്‍കുന്ന വിശദീകരണം.
സംഭവത്തിൽ ഉദ്യോഗസ്ഥവീഴ്ചയാണെന്ന് ചൂണ്ടിക്കാട്ടി എം.ഡിക്ക് പരാതി നല്‍കുമെന്ന് സ്റ്റേറ്റ് ട്രാന്‍സ്പോര്‍ട്ട് വര്‍ക്കേഴ്സ് യൂണിയന്‍ (ഐ.എന്‍.ടി.യു.സി) സംസ്ഥാന ഓര്‍ഗനൈസിങ് സെക്രട്ടറി മനോജ് ലാക്കയിലും ജില്ല പ്രസിഡന്‍റ് നസീര്‍ പറഞ്ഞു. യൂണിറ്റ് കമ്മിറ്റിയുടെ പ്രതിഷേധത്തില്‍ എം.ആര്‍. ശെല്‍വരാജ്, വി.പി. കുഞ്ഞു, പി.ടി. ഷറഫുദ്ദീന്‍, എ. മനോജ്, സി.പി. റഷീദ് എന്നിവര്‍ സംസാരിച്ചു.
Post Your Comments