ന്യൂഡല്‍ഹി • വിദ്വേഷ പ്രസംഗം നടത്തിയ ബി.ജെ.പി നേതാവും എം.എല്‍.എയുമായ ടി രാജാ സിംഗിനെ വിലക്കി ഫേസ്ബുക്ക്. ഫേസ്ബുക്കിനു പുറമേ ഇൻസ്റ്റാഗ്രാമിലും വിലക്കേര്‍പ്പെടുത്തിയിട്ടുണ്ട്. ഫേസ്ബുക്കിന്റെ നിബന്ധനകള്‍ക്ക് വിരുദ്ധമായ ഉള്ളടക്കങ്ങള്‍ പ്രചരിപ്പിച്ചതിനാലാണ് നിരോധനമെന്ന് ഫേസ്ബുക്ക് ഔദ്യോഗികമായി അറിയിച്ചു.
അക്രമവും വെറുപ്പും പ്രോത്സാഹിപ്പിക്കാന്‍ തങ്ങളുടെ പ്ലാറ്റ്‌ഫോം ഉപയോഗിച്ചതിനാല്‍ രാജ സിങ്ങിനെ നിരോധിക്കുന്നുവെന്ന് ഫേസ്ബുക്ക് വക്താവ് ഇമെയിൽ പ്രസ്താവനയിൽ പറഞ്ഞു.
300 ദശലക്ഷത്തിലധികം ഉപയോക്താക്കളുള്ള ഇന്ത്യയെ ഏറ്റവും വലിയ വിപണികളിലൊന്നായി കണക്കാക്കുന്ന ഫേസ്ബുക്ക് -അതിന്റെ ഉള്ളടക്ക നയങ്ങൾ ഇന്ത്യയിലെ ഭരണകക്ഷിയെ അനുകൂലിക്കുന്നുവെന്ന് വാൾസ്ട്രീറ്റ് ജേണൽ (ഡബ്ല്യുഎസ്ജെ) റിപ്പോർട്ട് ചെയ്തതിനെത്തുടർന്ന് ഏതാനും ദിവസങ്ങളായി സമ്മര്‍ദ്ദത്തിലാണ്.
You may also like: പ്രധാനമന്ത്രിയെയും മന്ത്രിമാരെയും അപമാനിക്കാന് ശ്രമം നടക്കുന്നു; ഫേസ്ബുക്കിനെ അതൃപ്തി അറിയിച്ച്‌ കേന്ദ്രസര്‍ക്കാര്‍
ബി.ജെ.പി എം.എൽ.എ രാജാ സിങ്ങിന്റെ വിദ്വേഷ പ്രസംഗം അടങ്ങിയ പോസ്റ്റുകൾ ഫേസ്ബുക്ക് അവഗണിച്ചുവെന്ന് റിപ്പോർട്ട് ആരോപിച്ചിരുന്നു. അതിനുശേഷം, ഭരണകക്ഷിയായ ബി.ജെ.പിയും കോൺഗ്രസും സോഷ്യൽ മീഡിയ ഭീമന്റെ പക്ഷപാതത്തെച്ചൊല്ലി ആരോപണ പ്രത്യാരോപണങ്ങള്‍ നടത്തി വരികയാണ്.
എന്നാല്‍ ടി.രാജ തനിക്ക് ഔദ്യോഗികമായ ഫേസ്ബുക് എകൗണ്ടില്ലെന്നും തന്റെ പേരില്‍ ഒട്ടനവധി പേജുകള്‍ ഉപയോഗിക്കുന്നത് തനിക്കറിയാമെന്നും ട്വിറ്ററിലൂടെ അറിയിച്ചിരുന്നു. അതിലെ പോസ്റ്റിനൊന്നും താന്‍ ഉത്തരവാദിയല്ലെന്നും അദ്ദേഹം വ്യക്തമാക്കിയിരുന്നു.
Post Your Comments