ഓട്ടോ നിയന്ത്രണം വിട്ട് ബൈക്കിലിടിച്ചു രണ്ടു വയസ്സുകാരന് ദാരുണാന്ത്യം

ചിറയിന്‍കീഴ്: ഓട്ടോയും ബൈക്കും കൂട്ടിയിടിച്ച് രണ്ട് വയസുകാരന് ദാരുണാന്ത്യം. പറകോണം ചാരുവിള വീട്ടില്‍ മനുവിന്റെയും അനുവിന്റെയും മകന്‍ ആദിയാണ് മരിച്ചത്. മതാപിതാക്കള്‍ക്കൊപ്പം സഞ്ചരിക്കവെ ഓട്ടോറിക്ഷ നിയന്ത്രണം വിട്ട് ബൈക്കില്‍ ഇടിക്കുകയായിരുന്നു. രാത്രി പെരുങ്ങുഴി മുസ്ലിം പള്ളിക്കും സഹകരണ ബാങ്കിനും സമീപത്തുവച്ചാണ് അപകടം നടന്നത്.

ഇടിയുടെ ആഘാതത്തില്‍ ബൈക്കിന് മുന്നിലിരുന്ന ആദി റോഡിലേക്കും മാതാപിതാക്കള്‍ പാതയോരത്തേക്കും വീണു. അപകടത്തിന് പിന്നാലെ ഓട്ടോ ഡ്രൈവര്‍ അനുരാജ് ഓടി രക്ഷപ്പെട്ടെങ്കിലും പിന്നീട് പൊലീസ് പിടിയിലായി. ഇയാള്‍ക്കെതിരെ മനഃപൂര്‍വമായ നരഹത്യയ്ക്ക് കേസെടുത്ത് റിമാന്‍ഡ് ചെയ്തു.