കേരള പ്രീമിയര്‍ ലീഗ്; സെമി ഫൈനല്‍, ഫൈനല്‍ തീയതി പ്രഖ്യാപിച്ചു

കേരള പ്രീമിയര്‍ ലീഗിന്റെ തീയതി പ്രഖ്യാപിച്ചു. ഈ വര്‍ഷത്തെ സെമി ഫൈനലിനും ഫൈനലിനുമുള്ള തീയതികളാണ് പ്രഖ്യാപിച്ചത്. നേരത്തെ കോഴിക്കോട് ഇ എം എസ് സ്റ്റേഡിയം ആകും സെമി ഫൈനലുകള്‍ക്കും ഫൈനലിനും വേദിയാവുക എന്ന് കെ എഫ് എ അറിയിച്ചിരുന്നു. മെയ് 11, 12 തീയതികളില്‍ ആയിരിക്കും സെമി ഫൈനലുകള്‍ നടക്കുക. മെയ് 18ന് ഫൈനലും നടക്കും. എല്ലാ മത്സരങ്ങളും വൈകിട്ട് 4 മണിക്കായിരിക്കും.

ആദ്യ സെമിയില്‍ ഗ്രൂപ്പ് എ ചാമ്പ്യന്മാരായ കേരള ബ്ലാസ്റ്റേഴ്‌സ് ഗ്രൂപ്പ് ബിയിലെ രണ്ടാം സ്ഥാനക്കാരായ എഫ് സി കേരളയെ നേരിടും. ഇരു ടീമുകളുടെയും ആദ്യ സെമി ഫൈനലാണിത്. രണ്ടാം സെമിയില്‍ ഗോകുലം കേരള എഫ് സിയുടെ എതിരാളികള്‍ ആരായിരിക്കും എന്ന് ഇതുവരെ തീരുമാനം ആയിട്ടില്ല. ഇന്ത്യന്‍ നേവിയും ആര്‍ എഫ് സി കൊച്ചിയുമാണ് അവസാന സെമി സ്ഥാനത്തിനായി പോരാടുന്നത്.