കൊച്ചി : ആലുവയിൽ പോലീസ് മർദ്ദനത്തിൽ കൊല്ലപ്പെട്ട ശ്രീജിത്തിന്റെ കേസിൽ ആര്‍.ടി.എഫ് ഉദ്യോഗസ്ഥർക്കെതിരെ കൊലക്കുറ്റം ചുമത്തിയതിനെ ഹൈക്കോടതി ചോദ്യം ചെയ്തു. ഇവര്‍ ഏല്‍പ്പിച്ച പരിക്ക് മരണകാരണമായാല്‍ മാത്രമേ ആര്‍.ടി.എഫിനെതിരെ കൊലക്കുറ്റം ചുമത്താനാകൂ.
സന്തോഷ് കുമാര്‍, ജിതിന്‍ രാജ്, സുമേഷ് എന്നിവരുടെ ജാമ്യാപേക്ഷ പരിഗണിക്കവെയാണ് കോടതിയുടെ പരാമര്‍ശം. ശ്രീജിത്തിനെ കസ്റ്റഡിയിലെടുത്ത ശേഷം നടത്തിയ ആദ്യ വൈദ്യ പരിശോധനകളിലൊന്നും ആഴത്തിലുള്ള പരിക്കുണ്ടായിരുന്നില്ല പിന്നെ എങ്ങനെ അത് കൊലകുറ്റമായി എന്ന് കോടതി ചോദിച്ചു . എന്നാല്‍ ശ്രീജിത്തിനെ പിടിക്കുമ്പോൾ ഏറ്റ മര്‍ദ്ദനങ്ങള്‍ മരണ കാരണമായേക്കാം എന്നാണ് ഡോക്ടര്‍ നല്‍കിയ മൊഴിയെന്ന് സര്‍ക്കാര്‍ കോടതിയെ അറിയിച്ചു.
എന്നാൽ ശ്രീജിത്തിനെ മർദ്ദിച്ചിട്ടില്ലെന്നും ഉന്നത ഉദ്യോഗസ്ഥരെ അനുസരിക്കുക മാത്രമാണ് ചെയ്തതെന്നും ആര്‍.ടി.എഫ് കോടതിയെ അറിയിച്ചു. ശ്രീജിത്ത് ആരാണെന്നും വാസുദേവന്റെ വീടാക്രമണത്തെ കുറിച്ചും അറിയില്ലായിരുന്നു. ശ്രീജിത്തിന് നേരത്തെയുളള അടിപിടിയിലാണ് പരിക്ക് പറ്റിയതെന്ന് ആശുപത്രി രേഖയിലുണ്ടെന്നും ഉദ്യോഗസ്ഥര്‍ കോടതിയില്‍ പറഞ്ഞു. കേസിലെ ജാമ്യാപേക്ഷ വിധി പറയാന്‍ മാറ്റിവെച്ചു.
Post Your Comments