അലഹബാദ്: ദളിത് യുവാവിനോടുള്ള തര്‍ക്കത്തിന്റെ പേരില്‍ അയാളുടെ സഹോദരിയെ തീ കൊളുത്തി കൊലപ്പെടുത്തിയ യുവാക്കളെ പോലീസ് അറസ്റ്റ് ചെയ്തു. ചൊവ്വാഴ്ച അലഹബാദിലെ റാണിഗഞ്ച് അജ്ഗാര വില്ലേജിലാണ് ഞെട്ടിക്കുന്ന സംഭവം നടന്നത്. പ്രതികളായ കല്ലുവും ദീപുവും ചേര്‍ന്ന് 19 കാരിയെ മണ്ണെണ്ണ ഒഴിച്ച് തീ വയ്ക്കുകയായിരുന്നു. ആശുപത്രിയില്‍ പ്രവേശിപ്പിച്ചെങ്കിലും ചികിത്സയിലിരിക്കെ പെണ്‍കുട്ടി മരിച്ചു.
ചൊവ്വാഴ്ച പെണ്‍കുട്ടി തനിച്ച് വീട്ടിലുള്ള സമയം പ്രതികള്‍ അതിക്രമിച്ച് കയറുകയും മണ്ണെണ്ണ ഒഴിച്ച് കുട്ടിയെ തീ വയ്ക്കുകയുമായിരുന്നു. പെണ്‍കുട്ടിയെ രക്ഷിക്കാന്‍ ശ്രമിച്ച അയല്‍വാസിയായ സാഹിലിനും പരുക്ക് പറ്റി. ഇയാളും ഇപ്പോള്‍ ചികിത്സയിലാണ്.
പെണ്‍കുട്ടിയുടെ സഹോദരന്‍ ബച്ചന്‍ പാസിയുമായി പ്രതികള്‍ക്ക് വിരോധം ഉണ്ടായിരുന്നുവെന്നും ഇതിനെ തുടര്‍ന്നാണ് പെണ്‍കുട്ടിയെ തീകൊളുത്തി കൊന്നതെന്നും പോലീസ് പറഞ്ഞു.
Post Your Comments