മുംബൈ: കുടുംബത്തിന്റെ സ്വകാര്യതയില്‍ കയറുന്ന നവമാധ്യമങ്ങളിലെ ചിലരുടെ ഇടപെടലുകള്‍ തനിക്ക് ബുദ്ധിമുട്ട് സൃഷ്ടിക്കുന്നുവെന്ന് വ്യക്തമാക്കി സച്ചിന്‍. തന്റെ മക്കളുടേതെന്ന പേരില്‍ നവമാധ്യമങ്ങളില്‍, പ്രത്യേകിച്ചും ട്വിറ്ററില്‍ ചില അക്കൗണ്ടുകള്‍ ശ്രദ്ധയില്‍ പെട്ടെന്നും അതൊക്ക വ്യാജ അക്കൗണ്ടുകളാണെന്നും ക്രിക്കറ്റ് ഇതിഹാസം വ്യക്തമാക്കി.
സാറയും അര്‍ജുനും ട്വിറ്റര്‍ ആക്കൗണ്ടുകളില്ലെന്ന് ആവര്‍ത്തിച്ചു വ്യക്തമായ സച്ചിന്‍ തന്റെ മക്കളെ വെറുതേവിടണമെന്നും അഭ്യര്‍ഥിച്ചു. മക്കളുടെ പേരിലുള്ള വ്യാജ അക്കൗണ്ടുകള്‍ എത്രയും വേഗത്തില്‍ ഇല്ലാതാക്കണമെന്ന് സച്ചിന്‍ ട്വിറ്റര്‍ അധികൃതരോട് ആവശ്യപ്പെടുകയും ചെയ്തു. ഇത്തരത്തില്‍ ചില വ്യക്തികള്‍ നവമാധ്യമങ്ങളിലൂടെ നടത്തുന്ന ചെയ്തികള്‍ തങ്ങള്‍ക്ക് ഏറെ ബുദ്ധിമുട്ട് സൃഷ്ടിക്കുന്നുണ്ടെന്നും അദ്ദേഹം ട്വിറ്ററില്‍ കുറിച്ചു.
മകള്‍ സാറ ബോളീവുഡിലേക്ക് ചുവടുവയ്ക്കുന്നുവെന്നതടക്കമുള്ള വാര്‍ത്തകള്‍ വീണ്ടും വന്നതിനു പിന്നാലെയാണ് വിശദീകരണവുമായി സച്ചിന്‍ വീണ്ടും രംഗത്തെത്തിയത്. സാറയുടെയും അര്‍ജുന്റെയും ചിത്രങ്ങളും ഇത്തരം വ്യാജ അക്കൗണ്ടുകളില്‍ നിരന്തരം പ്രത്യക്ഷപ്പെടുന്നുണ്ട്. യുവ ക്രിക്കറ്ററായ മകന്‍ അര്‍ജുന്‍ ടെന്‍ഡുല്‍ക്കര്‍ ഈ അടുത്ത് മുംബൈ അണ്ടര്‍-19 ടീമില്‍ ഇടം നേടുകയും ചെയ്തിരുന്നു.
Post Your Comments