വീരമൃത്യു വരിച്ച സൈനികരുടെ കുടുംബങ്ങൾക്ക് സഹായധനവുമായി അക്ഷയ് കുമാർ

അക്കിയെപോലെ ബോളിവുഡിലെ ഒരു സൂപ്പർ സ്റ്റാറിന് ഈ തുക വളരെ നിസ്സാരമാണെന്നു കേൾക്കുന്നവർക്ക് തോന്നാമെങ്കിലും അദ്ദേഹം ഭാരത് കെ വീർ എന്ന സംഘടനയ്ക്കായി , പ്രമുഖ ബിസിനസ്കാരെ ഉൾപ്പെടുത്തിയാണ് ആറരക്കോടി സമാഹരിച്ചത്. നാടിനു വേണ്ടി ജീവൻ ബലിയർപ്പിച്ച വീരയോദ്ധാക്കളുടെ കുടുംബത്തിനുള്ള കൈതാങ്ങ് ഈ സമൂഹത്തിൽ നിന്നും കണ്ടെത്തേണ്ടതാണെന്നും അത് ഒരാളുടെ മാത്രം കടമയല്ലെന്നും തന്റെ ഉദ്യമത്തിലൂടെ അക്കി നമ്മെ ബോധ്യപ്പെടുത്തുന്നു.

അക്ഷയ്‌കുമാർ ഉദ്ഘാടനം ചെയ്ത ഭാരത് കെ വീർ എന്ന വെബ്‌സൈറ്റിൽ, വീര ചരമം പ്രാപിച്ച 112 സൈനികരുടെ വിവരങ്ങൾ നൽകിയിരുന്നു . പിന്നീട് ഒരു ആഗോള നിക്ഷേപക സംഗമത്തിന്റെ ഭാഗമായി, ലോകമെമ്പാടും ഉള്ള സംരംഭകർ ഒത്തുകൂടിയപ്പോൾ, അവരെ അഭിസംബോധന ചെയ്തു സംസാരിക്കാനുള്ള അവസരം അദ്ദേഹത്തിന് ലഭിച്ചിരുന്നു.ആ അവസരത്തിലാണ് അദ്ദേഹം ഇങ്ങനെയൊരു സഹായം ചെയ്യേണ്ട ആവശ്യകതയെക്കുറിച്ചു വേദിയിൽ സംസാരിച്ചത്. അദ്ദേഹത്തിന്റെ ഉദ്ദേശ ശുദ്ധിയില്‍ ആർക്കും തെല്ലും സംശയമില്ലായിരുന്നു എന്നതിന്റെ തെളിവാണ് ഇപ്പോൾ സമാഹരിച്ചിരിക്കുന്ന ഈ പണം. 15 ലക്ഷം രൂപ വീതം ഓരോ കുടുംബത്തിനും നൽകാനാണ് അക്കിയുടെ ശ്രമം.