മാര്‍ക്കിന് ഒരു വിലയുമില്ലേ? കണ്ണീരോടെ ജെംഷ ചോദിയ്ക്കുന്നു

തിരുവനന്തപുരം: സ്വാശ്രയ മെഡിക്കല്‍ പ്രവേശന ഫീസ്‌ വര്‍ധിപ്പിച്ചതും ആറു ലക്ഷത്തിന്റെ ബാങ്ക് ഗ്യാരണ്ടി നിര്‍ബന്ധമാക്കിയതും നിരവധി പേരുടെ എം.ബി.ബി.എസ്. സ്വപ്നങ്ങളാണ് തകര്‍ത്തത്. എം.ബി.ബി.എസിനു പ്രവേശനം കിട്ടിയിട്ടും ബാങ്ക് ഗ്യാരന്റിയുടെ പേരില്‍ അതുപേക്ഷിച്ചു ബി.ഡി.എസിനു ചേരേണ്ടിവന്ന ജെംഷ അക്കൂട്ടത്തില്‍ ഒരാള്‍ മാത്രമാണ്.

തിരുവനന്തപുരം കരമന സ്വദേശിനിയായ ജെംഷയ്ക്ക് 2414 -ാം റാങ്കാണ് മെഡിസിനു ലഭിച്ചത്. ആദ്യ അലോട്ട്മെന്റില്‍ പി.കെ. ദാസ് കോളേജില്‍ പ്രവേശനം ലഭിച്ചു. അടുത്ത ദിവസം തിരുവനന്തപുരത്തെ ഗോകുലം മെഡിക്കല്‍ കോളജിലേക്കു മാറ്റം കിട്ടി. 150 സീറ്റുകളുള്ള കോളേജില്‍ 88-ാം സ്ഥാനത്തായിരുന്നു പ്രവേശനം. 29 നു പ്രവേശനം ലഭിച്ചു തിരികെ വീട്ടിലെത്തിയപ്പോഴാണ് അടച്ച അഞ്ചു ലക്ഷത്തിനു പുറമേ ആറ് ലക്ഷത്തിന്റെ ബാങ്ക് ഗ്യാരന്റി കൂടി നല്‍കണമെന്ന കോടതി വിധി അറിഞ്ഞത്. കോടതി അനുവദിച്ച 15 ദിവസത്തെ സമയപരിധിക്കുള്ളില്‍ പണം അടയ്ക്കാന്‍ മാര്‍ഗമില്ലെന്നു തിരിച്ചറിഞ്ഞ ജെംഷ ബുധനാഴ്ച സ്പോട്ട് അലോട്ട്മെന്റിനെത്തി. ഏറെ ആഗ്രഹിച്ചു ലഭിച്ച എം.ബി.ബി.എസ് ഉപേക്ഷിച്ചു ബി.ഡി.എസിനു ചേരാനായിരുന്നു ഇത്. അതുവരെ ബാങ്ക് ഗ്യാരന്റിയില്‍ സര്‍ക്കാര്‍ ഉറപ്പു നല്‍കുമെന്ന ഒരു സൂചനയും ലഭിച്ചിരുന്നില്ല. ബാങ്കുകളുടെ യോഗം വിളിച്ചു എന്നതു മാത്രമായിരുന്നു സര്‍ക്കാരെടുത്ത നടപടി.