ന്യൂഡല്‍ഹി: നിയമസഭാ തെരഞ്ഞെടുപ്പില്‍ ബിജെപിക്കുണ്ടായ വന്‍ വിജയത്തില്‍ ജനങ്ങള്‍ക്ക് നന്ദി പറഞ്ഞ് പ്രധാനമന്ത്രി നരേന്ദ്രമോദി. ബിജെപിയില്‍ വിശ്വാസമര്‍പ്പിച്ച എല്ലാവര്‍ക്കും നന്ദി പറയുന്നു. പാര്‍ട്ടി പ്രവര്‍ത്തകരുടെ കഠിനാധ്വാനമാണ് ഈ വിജയത്തിന് പിന്നിലെന്നും പ്രധാനമന്ത്രി പറഞ്ഞു. യുവാക്കളില്‍ നിന്ന് ഈ തെരഞ്ഞെടുപ്പില്‍ പാര്‍ട്ടിക്ക് വന്‍ പിന്തുണ കിട്ടിയത് കൗതുകമുണര്‍ത്തുന്നതാണെന്നും ട്വിറ്ററിലൂടെ അദ്ദേഹം വ്യക്തമാക്കി. ജനങ്ങളുടെ ക്ഷേമത്തിനായി ഓരോ നിമിഷവും പ്രവര്‍ത്തിക്കുമെന്നും 125 കോടി ജനങ്ങള്‍ ഞങ്ങളില്‍ വിശ്വാസമര്‍പ്പിച്ചിരിക്കുകയാണെന്നും പ്രധാനമന്ത്രി പറഞ്ഞു.
തെരഞ്ഞെടുപ്പിനെ മുന്നില്‍ നിന്ന് നയിച്ച പാര്‍ട്ടിയധ്യക്ഷന്‍ അമിത് ഷായ്ക്കും പാര്‍ട്ടിയെ ഉരങ്ങളിലെത്തിക്കാന്‍ മാതൃകാപരമായി പ്രവര്‍ത്തിച്ച പാര്‍ട്ടിയുടെ എല്ലാ ഭാരവാഹികള്‍ക്കും സംസ്ഥാന യൂണിറ്റുകള്‍ക്കും പ്രധാനമന്ത്രി അഭിനന്ദനം അര്‍പ്പിച്ചു. പാര്‍ട്ടിയുടെ വിജയത്തിനായി ജനങ്ങളുടെ ഇടയില്‍ ഇറങ്ങി കഠിനാധ്വാനം നടത്തിയ പ്രവര്‍ത്തകരെ ഞാന്‍ വന്ദിക്കുന്നു- പ്രധാനമന്ത്രി പറഞ്ഞു. പാര്‍ട്ടിക്ക് തിരിച്ചടി നേരിട്ടെങ്കിലും പത്തുവര്‍ഷം ബിജെപി – അകാലി ദള്‍ സഖ്യത്തിന് അവസരം നല്‍കിയ പഞ്ചാബിലെ ജനങ്ങളോട് നന്ദി പറയുന്നതായും നരേന്ദ്ര മോദി അറിയിച്ചു.
Post Your Comments