ഓണാഘോഷം: ഇടതു സംഘടനകള്‍ വരെ മുഖ്യമന്ത്രിയുടെ നിര്‍ദ്ദേശം ലംഘിച്ചതിനെതിരെ വിമര്‍ശനമുയരുന്നു

മുഖ്യമന്ത്രിയുടെ നിര്‍ദേശത്തിനു പുല്ലുവില കല്‍പ്പിച്ച്‌ മുഖ്യമന്ത്രിയുടെ ഓഫീസ് ഉള്‍പ്പെടുന്ന സെക്രട്ടേറിയറ്റ് നോര്‍ത്ത് ബ്ലോക്കിനു മുമ്പില്‍ പൂക്കളമിട്ട കോണ്‍ഗ്രസ് സംഘടനാ പ്രവര്‍ത്തകർക്കും പണി കിട്ടാൻ സാധ്യതയുണ്ട്.മുഖ്യമന്ത്രി ദിവസങ്ങള്‍ക്കു മുൻപ് സെക്രട്ടേറിയറ്റില്‍ എത്തുന്ന പൊതുജനത്തിന്റെ ആവശ്യങ്ങള്‍ നടത്തിക്കൊടുക്കുന്നത് ഉള്‍പ്പെടെ വൈകിപ്പിക്കുകയും ചുമതലകള്‍ സമയത്ത് നിര്‍വഹിക്കാതെയും ജീവനക്കാര്‍ ജോലിസമയത്ത് പൂക്കളമിടുകയും ഓണസദ്യക്ക് പോവുകയും ചെയ്യരുത് എന്നാണ് പറഞ്ഞത്.

പൂക്കളവും മറ്റും ജോലിയുടെ ഇടവേളകളില്‍ വേണം എന്ന് നിര്‍ദേശിക്കുകയും ചെയ്തു. എന്നാല്‍ ഓണം ആഘോഷിക്കുന്നതിനെത്തന്നെ മുഖ്യമന്ത്രി വിലക്കി എന്ന മട്ടില്‍ മറ്റു പാർട്ടികൾ പ്രചരിപ്പിച്ചു. പ്രതിപക്ഷ നേതാവ് രമേശ് ചെന്നിത്തലയും ബിജെപി സംസ്ഥാന പ്രസിഡന്റ് കുമ്മനം രാജശേഖരനും നടത്തിയ പ്രതികരണങ്ങള്‍ ആ വിധത്തിലായിരുന്നു. അതോടെ ജീവനക്കാരില്‍ ഒരു വിഭാഗം മുഖ്യമന്ത്രിയുടെ വിലക്ക് ലംഘിച്ച്‌ ഓണാഘോഷം നടത്താന്‍ തീരുമാനിച്ചു.

സിപിഎം സംഘടനയുടെ ഓണാഘോഷവും മുഖ്യമന്ത്രി പറഞ്ഞ സമയക്രമം പാലിക്കുന്നില്ല എന്നുവന്നതോടെ സംഘടനയ്ക്കുള്ളില്‍ ചേരിതിരിവായി. കഴിഞ്ഞ ദിവസം ഉച്ചയ്ക്ക് 12ന് തുടങ്ങി മൂന്നു മണിക്കാണ് അവര്‍ സംഘടിപ്പിച്ച ഓണസദ്യ അവസാനിച്ചത്. അതേമട്ടിലാണ് വ്യാഴാഴ്ച നടത്താന്‍ നിശ്ചയിച്ചിരിക്കുന്ന ഓണക്കളികളുടെയും മറ്റും സമയക്രമം. ഇതാണ് സിപിഎം നേതൃത്വത്തെ ചൊടിപ്പിച്ചത്. മുഖ്യമന്ത്രിയുടെ നേരിട്ടുള്ള ഇടപെടല്‍ കൂടാതെതന്നെ ഇക്കാര്യങ്ങളില്‍ ശക്തമായ നിലപാടെടുക്കാനാണ് പാര്‍ട്ടി തീരുമാനം.