ബഹിരാകാശത്ത്‌ ഇന്ത്യയുടെ ശക്തി ഗണ്യമായി വര്‍ദ്ധിപ്പിക്കുന്ന മിഷന് തയാറെടുത്ത് ഐ.എസ്.ആര്‍.ഒ

അടുത്ത മാസം ഒറ്റ വിക്ഷേപണത്തില്‍ 22 ഉപഗ്രഹങ്ങളെ ബഹിരാകാശത്ത് എത്തിക്കുമെന്ന് ഐ.എസ്.ആര്‍.ഒ. ഐ.എസ്.ആര്‍.ഒ അദ്ധ്യക്ഷന്‍ കിരണ്‍ കുമാര്‍ അറിയിച്ചതാണ് ഇക്കാര്യം.

പുനരുപയോഗിക്കാവുന്ന ബഹിരാകാശപേടകത്തിന്‍റെ പരീക്ഷണ വിക്ഷേപണം വിജയമായിരുന്നു എന്നും കിരണ്‍ കുമാര്‍ അറിയിച്ചു.

22 ഉപഗ്രഹങ്ങളില്‍ 3 എണ്ണം ഇന്ത്യയുടെ ഉപഗ്രഹങ്ങള്‍ ആയിരിക്കുമെന്നും ബാക്കിയുള്ളവ മറ്റു രാജ്യങ്ങളില്‍ നിന്നുള്ള വാണിജ്യ ഉപഗ്രഹങ്ങള്‍ ആയിരിക്കുമെന്നും കിരണ്‍ കുമാര്‍ പറഞ്ഞു. പി.എസ്.എല്‍.വി സി-34 ഉപയോഗിച്ച് നടത്തുന്ന പ്രസ്തുത വിക്ഷേപണത്തില്‍ അമേരിക്ക, കാനഡ, ജര്‍മ്മനി, ഇന്തോനേഷ്യ തുടങ്ങിയ രാജ്യങ്ങളില്‍ നിന്നുള്ള ഉപഗ്രഹങ്ങളും ഉള്‍പ്പെടും.

ഇതിനു മുമ്പ് 2008-ല്‍ ഐ.എസ്.ആര്‍.ഒ ഒറ്റ വിക്ഷേപണത്തില്‍ 10 ഉപഗ്രഹങ്ങള്‍ ബഹിരാകാശത്തേക്ക് വിജയകരമായി അയച്ചിരുന്നു.