ലോകകപ്പ്‌ യോഗ്യതാ മത്സരം: അര്‍ജന്‍റീനയ്ക്ക് വിജയം

ചിലിക്കെതിരായ നിര്‍ണ്ണായക ലോകകപ്പ്‌ യോഗ്യതാ മത്സരത്തില്‍ അര്‍ജന്‍റീനയ്ക്ക് വിജയം. പിന്നില്‍ നിന്ന്‍ തിരിച്ചു വന്നാണ് നിലവിലെ റണ്ണര്‍-അപ്പുകള്‍ വിജയിച്ചത്.

പത്താം മിനിറ്റില്‍ ഫിലിപ്പെ ഗുട്ടിറെസിലൂടെ ചിലിയാണ് ആദ്യം മുന്നിലെത്തിയത്. പക്ഷേ 19-ആം മിനിറ്റില്‍ ആംഗല്‍ ഡി-മറിയയും 24-ആം മിനിറ്റില്‍ റിവര്‍ പ്ലേറ്റ് താരം ഗബ്രിയേല്‍ മെര്‍ക്കാഡോയും ചിലിയന്‍ വല കുലുക്കിയതോടെ നിര്‍ണ്ണായക എവേ മത്സരത്തില്‍ അര്‍ജന്‍റീന ജയം പിടിച്ചു വാങ്ങി. ജയത്തോടെ ലാറ്റിന്‍ അമേരിക്കന്‍ ഗ്രൂപ്പില്‍ അര്‍ജന്‍റീന നാലാം സ്ഥാനത്തേക്ക് ഉയര്‍ന്നു.

ഗോളടിചില്ലെങ്കിലും ലോകഫുട്ബോളര്‍ ലയണല്‍ മെസ്സിയുടെ പ്രകടനം അര്‍ജന്‍റീനിയന്‍ വിജയത്തില്‍ നിര്‍ണ്ണായകമായി.

ലാറ്റിന്‍ അമേരിക്കന്‍ മേഖലയിലെ മറ്റൊരു മത്സരത്തില്‍ കൊളംബിയ ബൊളീവിയയെ അവരുടെ സ്റ്റേഡിയത്തില്‍ പരാജയപ്പെടുത്തി. കൊളംബിയയ്ക്കായി ഹമെസ് റോഡ്രിഗസ്, കാര്‍ലോസ് ബാക്ക, എഡ്വിന്‍ കാര്‍ഡോണ എന്നിവര്‍ ഗോള്‍ നേടി. ഇക്വഡോര്‍-പരാഗ്വേ, പെറു-വെനെസ്വേല മത്സരങ്ങള്‍ 2-2 സ്കോറില്‍ സമനിലയായി.

ഗ്രൂപ്പില്‍ അഞ്ച് മത്സരങ്ങള്‍ കഴിഞ്ഞപ്പോള്‍ 13 പോയിന്‍റോടെ ഇക്വഡോര്‍ ആണ് മുന്‍പില്‍. അഞ്ചാം സ്ഥാനത്തുള്ള ബ്രസീല്‍ ഇന്ന് നാട്ടില്‍ രണ്ടാം സ്ഥാനത്തുള്ള ഉറുഗ്വേയെ നേരിടും.