വിജയ് – ലോകേഷ് ചിത്രം സൂപ്പർ ഹിറ്റിലേക്ക് കുതിക്കുമ്പോൾ കേരളത്തിലടക്കം വൻ സ്വീകാര്യതയാണ് ചിത്രത്തിന് ലഭിക്കുന്നത്. ഇതിനിടെ ഇന്ന് പാലക്കാട് തിയറ്റർ സന്ദർശനത്തിനിടെ പരിക്കേറ്റ ലിയോ സംവിധായകൻ ലോകേഷ് കനകരാജ് തിരികെ മടങ്ങി എന്ന ഞെട്ടിക്കുന്ന വാർത്തയാണ് പുറത്ത് വരുന്നത്.
ആരാധകരുടെ ആവേശത്തിൽ ലോകേഷിന് കാലിന് പരിക്കേറ്റുവെന്നാണ് റിപ്പോർട്ടുകൾ. കേരളത്തിലെ തിയേറ്ററുകളിൽ വൻ വിജയമായി മാറിയ ലിയോയുടെ പ്രമോഷന്റെ ഭാഗമായി കേരളത്തിലെത്തിയ സംവിധായകൻ ലോകേഷ് കനകരാജിനെ കാണാൻ വൻ ജനക്കൂട്ടമാണ് ഇന്ന് പാലക്കാട് കവിത തിയറ്ററിൽ തടിച്ചുകൂടിയത്.
സുരക്ഷാ സംവിധാനങ്ങൾ മറികടന്ന് എത്തിയവരെ നിയന്ത്രിക്കാൻ പോലീസിന് ലാത്തി വീശേണ്ടി വന്നു. കാലിന് പരിക്കേറ്റ സംവിധായകൻ ലോകേഷ് കനകരാജ് മറ്റ് പരിപാടികൾ റദ്ദാക്കി ചെന്നൈയിലേക്ക് മടങ്ങിയതായാണ് വിവരം. ഇന്ന് നടത്താനിരുന്ന തൃശൂർ രാഗം തിയേറ്റർ, എന്നിവിടങ്ങളിലേക്കുള്ള തിയറ്റർ സന്ദർശനങ്ങൾ അദ്ദേഹം ഒഴിവാക്കി. ഇന്ന് കൊച്ചിയിൽ നടക്കാനിരുന്ന വാർത്താ സമ്മേളനത്തിന് മറ്റൊരു ദിവസം എത്തുമെന്ന് ലോകേഷ് അറിയിച്ചു. കേരളത്തിലെ ആരാധകരെ കാണാൻ വീണ്ടും വരുമെന്നും ലോകേഷ് വ്യക്തമാക്കിയിട്ടാണ് മടങ്ങിയത്.
Post Your Comments